Luis Enrike: Nuk besoj në mallkime, e mund Sociedadin
Luis Enrike ka folur para ndeshjes së Kupës së Mbretit kundër Sociedadit, duke shprehur besim që do arrijnë të fitojnë për herë të parë në këtë transfertë prej gati 10 vitesh. Ai nuk u kushton rëndësi statistikave, ndërkohë që thur elozhe për formën e Nejmarit dhe së fundmi Rakitiçit.
Sa ndryshon përgatitja e një ndeshje për Kupën e Mbretit, krahasuar me ato të kompeticioneve të tjera?
Për mua si trajner nuk ndryshon aspak. Shpresoj që edhe për lojtarët të jetë e njëjtë, sidomos sa i përket motivimit. Mundohemi të studiojmë kundërshtarin, të përgatitemi si duhet për të fituar. Faza çerekfinale nuk të lejon hapa falsë dhe ne do kërkojmë që të fitojmë ndeshjen e parë, në mënyrë që ajo e kthimit të jetë më e lehtë.
Ju shqetëson fakti që Barcelona ka shumë vite që nuk fiton në stadiumin e Sociedadit?
E kam thënë edhe herë të tjera që këto statistika nuk influencojnë aspak, pasi ndryshojnë rrethanat. Janë futbollistë të tjerë, në kushte
të tjera, trajnerë të tjerë. Nuk besoj në "mallkime", pasi në fushën e lojës e kemi gjithçka në dorën tonë.
Sa i rëndësishëm është Rakitiç për ju?
Shumë. Ivan është një lojtar i nivelit të lartë, me cilësi të shkëlqyera. Forma e tij e mirë fizike është një garanci për gjithë skuadrën. Nuk dua ta komentoj më tej, pasi vlerësimin që kam për të e kam treguar gjithnjë.
Ndeshjen do e arbitrojë Gonzalez, ndaj të cilit keni pasur pakënaqësi në të shkuarën. Edhe ju personalisht. Si e prisni?
Nuk mendoj asnjëherë për arbitrin. Kam folur shumë rrallë dhe gjithnjë pas ndeshjes. Ndonjëherë i influencuar edhe nga emocionet e takimit.
Si është gjendja e Nejmarit?
E shikoj gjithnjë duke u argëtuar kur ka topin dhe kjo tregon dashurinë e tij për këtë sport. Ka më tepër personalitet dhe është më efikas.
Mendoni se Arda Turan e ka kaluar me sukses fazën e vështirë?
Nuk ka qenë evolucion, pasi ai gjithnjë ka treguar potencialin që zotëron.
Thjesht iu desh kohë për t'u ambientuar dhe tani e ka më të lehtë të bashkëpunojë me shokët e skuadrës.
Sa ka ndikuar Van Gal në karrierën tuaj si trajner?
Kam pasur fatin që ta kem trajner dhe sigurisht që kam mësuar prej tij. I kam huazuar deri diku stilin e punës, pasi ishte metodik, i palodhur dhe gjithnjë duke folur me kolegët e tij. Kjo të jep mundësinë të përmirësohesh.
Sa e rëndësishme është për ju Kupa e Mbretit?
Aq sa dua ta fitoj patjetër... (qesh)