Lukas Leiva shpëton Liverpulin

Origi gabon nga pika e bardhë, Plajmuthi nuk reziston dot në ndeshjen e dytë

Liverpuli ka arritur të sigurojë "biletën" për në raundin tjetër të Kupës së Anglisë pas plot 180 minutash përballë rivalit të Ligës 2, Plajmuthi. Kur ndeshja e parë u mbyll në barazim pa gola, këtë herë ka mjaftuar një fitore minimale për të vazhduar aventurën në kompeticion. Ishte Lukas Leiva ai që vulosi triumfin, ndërkohë që Origi shpërdoroi një mundësi të artë nga pika e bardhë e penalltisë.

Ndeshja - Jurgen Klop u besoi disa prej yjeve të tij në ndeshjen e dytë kundër Plajmuthit, duke aktivizuar që nga minuta e parë Kutinjon apo Starrixh. Ndërsa pjesa tjetër ishin kryesisht lojtarë të rinj në moshë, të cilët e panë si një mundësi të artë për të treguar potencialin që zotërojnë. Ndeshja nisi me një dominim të të kuqve dhe, në fakt, goli i avantazhit nuk vonoi. Ishte Lukas Leiva, i cili gjuajti saktë me kokë një krosim nga goditja e këndit në minutën e 18-të. Në fakt, festa e tij ishte plotësisht e justifikuar, pasi hera e fundit që kishte gjetur rrugën e rrjetës për Liverpulin datonte më tepër se gjashtë vite më parë, saktësisht në shtator të 2010ës. Një gol që u dha miqve më tepër qetësi në lojë, por jo qartësinë e duhur në aksionet sulmuese. Pas disa rasteve të shpërdoruara, mundësia

më e mirë për të shënuar golin e sigurisë erdhi në minutën e 87-të, kur skuadra e Klopit fitoi penallti. Por, gjuajtja e Origit ishte e dobët dhe u prit pa shumë vështirësi prej gardianit Mekormik, duke u bërë i pari 11metërsh që nuk realizohet,

prej 12 tentativave. Madje, lojtari që nuk ishte treguar i saktë ishte Stiven Xherrard në vitin 2015. Gjithsesi, vendësit e Plajmuthit nuk patën shumë shanse për të marrë një rezultat befasues, duke i dhënë fund rrugëtimit të tyre në Kupë.