Spektakël i Skënderbeut, Vllaznia fut në sherr Korabin
Administratori Mziu dhe Sheta përplasen pas ndeshjes. Mbrojtësi: “Më goditi, do ta çoj në burg”. Drejtuesi: “Lojtari tallet me klubin”
Vllaznia u ka dhënë fund shpresave të Korabit për të mbijetuar në Kategorinë Superiore, pasi e ka mposhtur dje në një ndeshje pa shumë emocione në stadiumin "Niko Dovana" të qytetit të Durrësit. Nga një gol në çdo pjesë i kanë mjaftuar ekipit të Cungut që të marrë një trepikësh, i cili jep qetësi për pozicionin e skuadrës së tij në tabelën e klasifikimit.
Pjesa e parë - Minutat e para të takimit janë të qeta dhe skuadrat zhvendosin lojën kryesisht në mesfushë. Edhe pse Korabi pritej që ishte pak më agresiv, duke qenë se i nevojiteshin pikët me çdo kusht, të parët që tentojnë të gjejnë golin e avantazhit janë shkodranët me anë të Shtubinës, i cili në minutën e 4-t gjuan fort nga distanca, por portieri Laço arrin të grushtojë me vështirësi. Dibranët e kanë të vështirë të reagojnë dhe trajneri Haxhiu dëgjohet shpeshherë të udhëzojë lojtarët e tij që të luftojnë për topin e parë. Megjithatë ata që të do të shënojnë janë shkodranët dhe për këtë mendon eksperienca e Bakajt. Minuta e 17-të dh Çela me Shetën nuk kuptohen mes tyre duke lënë topin që të shkojë te Bakaj. Ky i fundit në pozicion ballor me portën e Laços në kufijtë e zonës godet dhe e dërgon sferën aty ku portieri i dibranëve nuk mund të bëjë asgjë. Tre gola në tre takime tregojnë se kuqeblutë kanë bërë lëvizjen e duhur në merkato duke siguruar shërbimet e mesfushorit. Edhe pse në disavantazh, Korabi nuk e ka forcën për të reaguar, ndërsa Vllaznia tërhiqet disi në mbrojtje të rezultatit dhe mundohet të administrojë takimin, pa menduar shumë për thellimin e diferencës. E kotë është tentativa e Arifajt një minutë nga fundi i pjesës së parë më një gjuajtje nga larg, pasi topi shkon mbi kuadratin e Agoviç, i cili në këtë 45-minutësh ka qenë më shumë si spektator.
Pjesa e dytë - Fraksioni i dytë i lojës do të jetë edhe më i dobët se i pari sa u takon rasteve të krijuara nga të dyja skuadrat. Lojtarët e Korabit mundohen të gjejnë portën kundërshtare me goditje nga jashtë zone, por nuk janë të saktë. Trajneri Haxhiu hedh në fushë edhe lojtarët që ka në dispozicion, megjithatë goli nuk vjen. Në minutat e fundit, kur dukej se kuqeblutë po siguronin
një fitore minimale, Hebaj i aktivizuar si zëvendësues në minutën e 88-të dyfishon shifrat. Në një aksion të Vllaznisë, ai shfrytëzon një top të ardhur pa shumë pretendime në zonën e Korabit dhe pas gjuajtjes me kokë arrin të kalojë portierin Laço. Ky i fundit kthehet dhe
largon sferën në vijën fatale, por Hebaj e kontrollon sërish duke mos e lejuar topin të shkojë fundore. Ai zhvendoset bukur disi më në qendër dhe gjuan fort duke mos i dhënë mundësinë këtë herë "gardianit" të Korabit që të reagojë dhe i dhuron qetësinë trajnerit Cungu.