Penallti në fund, Barça ia del me vuajtje
Skuadra e Enrikes shumë e lodhur në fushë, "Camp Nou" nuk i kursen vërshëllimat
Tri pikë në frymëmar rjen e fundit që shmangin turpërimin, por nuk i largojnë erërat e krizës në shtëpinë blaugrana. Pas natës së tmerrshme të Parisit, Barcelona ngre kokën në kampionat falë një dopiete të Lionel Mesit. Por, për të gjunjëzuar Leganesin (skuadra e 17-të që vinte nga 3 humbje radhazi dhe pa fituar prej nëntorit), duhet një penallti për "Pleshtin", autor i golit të 19-të sezonal në kampionat dhe i 34-ti në 34 ndeshjet e këtij sezoni. E tmerrshme mbrojtja e Enrikes dhe vendimtar Ter Shtegen, autor i ndërhyrjeve shpëtimtare. Në "Camp Nou" dëgjohet edhe ndonjë vërshëllimë, por ata arrijnë që të ruajnë vendin e dytë një pikë pas Realit.
Kronika - Barcelona duket se nuk ka kohë për të humbur dhe pas vetëm 4 minutash gjen avantazhin falë një goli të Mesit, i cili është i vendosur mirë në shtyllën e dytë kur shërbehet nga Luis Suarez në krahun e majtë. Por e nxjerrin kokën edhe miqtë që, për pak, sa nuk barazojnë me një dopio-aksion të El Zharit, por Ter Shtegen i përgjigjet në mënyrë të shkëlqyer. Katalanasit duan ta mbyllin shpejt ndeshjen, por Herrerin nxiton ndaj Mesit, i cili përpiqet të mbyllë më së miri një
trekëndësh me Suarezin. Leganesi kërcënon sërish: në fillim provon Mantovani nga zhvillimet e një goditjeje këndi, pastaj është vendimtar sërish Ter Shtegen ndaj El Zharit. Për të luajtur me zjarrin, mendon një gafë e Rafinjës në 68' përpara porte dhe, mbi të gjitha, një mbrojtje me mungesa të mëdha (të ruajtur nga Enrike për të shmangur skualifikimet apo ndonjë dëmtim një javë përpara ndeshjes me Atletikon). Dhe
në minutën e 71- të Barça ndëshkohet: gabimi i radhës nga Serxhi Roberto, topi rrëmbehet nga Makis, i cili shërben për të çmarkuarin Unai Lopez në zonë dhe "Camp Nou" ngrin nga goditja e tij me të parën. Por, për të shpëtuar vendësit mendon një penallti në minutën e fundit (fituar nga Nejmar) dhe gjakftohtësia e Mesit, i cili festoi me zemërim përpara një publiku, i cili në fund nuk e fshehu pakënaqësinë e tij.