Barazim me Besëlidhjen, por feston Kamza
Shumë raste, por asnjë gol, skuadra e Brukës nuk gjen formën në ndeshjet e kampionatit
Ndeshja përmby llëse e javës së 16të midis Kamzës dhe Besëlidhjes, e zhvilluar dje në stadiumin "Kastrioti" në Krujë, nuk ka shkuar më shumë se barazimi pa gola. Edhe pse përfundoi me rrjeta të paprekura, duhet thënë se ishte një sfidë interesante dhe me raste të shumta për shënim nga të dyja skuadrat. Ajo u luajt në një terren të rënduar, ku gjithsesi të dy ekipet u përpoqën të arrinin te fitorja, por që në fund ndanë nga një pikë. Sigurisht, të gëzuar dalin kamzalinjtë që ruajnë diferencën + 10 pikë ndaj lezhjanëve.
Ndeshja - Minutat e para ishin një studim për të dyja skuadrat dhe vetëm pas minutës së 7- të, vendësit spostuan lojën përpara. Rezi tenton me kokë duke u pasuar nga Nimani, por pa rezultat. Disa minuta më pas, të besuarit e Devollit i afrohen sërish golit të avantazhit me protagonistë Ymerin, i cili, pas daljes së gabuar të portierit Demi, nuk shfrytëzon mundësinë e dhënë me portën e boshatisur. Pavarësisht rasteve, goli mungon. Në minutën e 32-të, Lekaj tenton portën me një goditjeje potente në hyrje të zonës, por nuk e ka të vështirë Gjonikaj të neutralizojë. Vendësit krijojnë më shumë raste, me protagonistë Rezin dhe Ymerin,
por shfaqin dobësi në finalizim. Edhe miqtë ndërkaq tentojnë me Ajazin, por topi i tij në fundin e pjesës së parë shkon pa adresë. Pjesa e parë mbyllet pa gola, ndërsa me fillimin e fraksionit të dytë loja ka më shumë ritëm. Në të 49ën, Nimani, nuk arrin ta kontrollojë
si duhet topin e dhënë nga Rezi. Lezhjanët luajnë me qetësinë e duhur, ku jo vetëm mbrohen mjaft mirë, por edhe arrijnë ta kontrollojë lojën në mesin e fushës, ku dhe herë pas here mundohen të rrezikojnë me Seminën dhe nigerianin Kamara. Duhet të
kalojnë minuta të tëra për të parë një aksion të rrezikshëm të kamzalinjve, të cilët i afrohen golit me anë të sulmuesit Malindi, por topi i goditur prej tij kalon gjithë pasqyrën e portës dhe kalon ngjitur me traversën. Pavarësisht rasteve, nuk ka asnjë gol.