Sinella: Japim shpirtin në fushë për fitoren
I Laçit karikon kurbinasit në prag të sfidës kundër Kukësit
Trajneri i Laçit, Bledar Sinella, u shpreh i zhgënjyer nga eliminimi në kompeticionin e Kupës së Shqipërisë, teksa ka thënë se ajo humbje do të shpërblehet me fitoren ndaj Kukësit të vendit të parë në kampionat. Laçi do të synojë fitoren e radhës në shtëpi, edhe pse përballë do të ketë një prej skuadrave më në formë, që duke ditur mjaft mirë vështirësitë, do të kërkojë medoemos tri pikët për t'i shpëtuar rënies nga kategoria. Në një prononcim të dhënë për "Panorama Sport", trajneri Sinella foli në lidhje me gjendjen e ekipit dhe objektivat në këtë ndeshje. "Ndeshja e sotme është e një niveli tepër të lartë për t'u motivuar, për vetë faktin se kuksianët gëzojnë një formë të mirë dhe ndodhen në vendin e parë të klasifikimit. Gjendja e skuadrës përpara këtij takimi është optimale, ku mbi të gjitha skuadra është e mobilizuar dhe e gatshme për të bërë më të mirën që të prodhojë një lojë të bukur dhe të marrë një rezultat me vlerën e tri pikëve. Objektivi ynë normalisht që do të jetë fitorja, pasi në çdo ndeshje futemi për të marrë maksimumin dhe e kemi treguar se jemi një skuadër e fortë që, me dëshirë dhe vullnet, kërkon të mbijetojë medoemos në këtë kategori", u shpreh si fillim Sinella. Më tej, tekniku kavajas ka shprehur bindjen e tij, ku thotë se nesër (sot) do të shikoni Laçin e vërtet. "Duhet të japim shpirtin në fushë dhe ta tregojmë çdo gjë me lojën dhe rezultatin. Sot do të shikoni se kush është 100% Laçi im. Kushdo që do të jetë në formacion jam i sigurt që do të jetë në lartësinë e duhur dhe do të bëjë më të mirën që Laçi të marrë rezultatin pozitiv të radhës në shtëpi".