Gurë anësorit në Delvinë, Naftëtari nuk ndalet
Kuçovarët ruajnë kreun, luhet një përballje e tensionuar
Delvina nuk ia del dot në shtëpi ndaj krye suesve të Grupit B, Naftëtarit, teksa është mundur 1-0. Kuçovarët vazhdojnë të mos ndalen dhe mbeten sërish në krye të Grupit B. Një takim shumë i fortë, me nervozizëm dhe përplasje mes futbollistëve. Por, kulmi arriti në pjesën e dytë kur u godit me sende të forta një prej anësorëve. Arbitrit iu dha ndihma mjekësore, në një kohë që në pjesën e tifozërisë nga erdhën goditjet me gurë, u vendos një kordon i madh policor që qëndroi deri në fund të takimit.
Ndeshja - Pjesa e parë, edhe pse është interpretuar më mirë nga vendësit, u konkretizua me golin e vetëm të minutës së 44t nga mesfushori mik Shaba. Pas një krosimi perfekt nga e majta, Shaba përpunon topin me të majtën dhe në ecje e sipër shënon me këmbën e djathtë një supergol. Minutat para golit të kuçovarëve kanë folur më shumë për vendësit, por kapiteni- trajner Mehmeti i vetëm nuk mund të bëjë më shumë. Me rezultatin 1-0 për miqtë nga Kuçova është mbyllur pjesa e parë. Fraksioni i dytë nis me një aksion të bukur për kuçovarët, të cilët shpërdorojnë mundësinë e dyfishimit. Kame, pas rreshtimit të gabuar të mbrojtjes vendëse, përballë portierit Ceka shpërdoron mundësinë e artë. Pas minutës së 55-të, vendësit nuk pajtohen me rezultatin, por nuk arrijnë të shënojnë. Në minutën e 84-t, tifozët godasin me mjete të forta anësorin Emirion Çuni. Arbitrit i jepet ndihma e parë, në një kohë që sfida ndërpritet për rreth 2-3 minuta. Në këtë moment, në vendin e tifozëve që hodhën sende në fushë rreshtohet një kordon policor që garanton vazhdimin normal të sfidës. Miqtë e ruajnë avantazhin deri në fund.