Milani “heq qafe” Fiorentinën
Ekipi i Vinçenco Montelës “përshëndet” Silvio Berluskonin me një fitore në Milano
Për dy trajnerë, në vigjilje nuk ishte një sfidë vendimtare për Europën, mirëpo klasifikimi dëshmon të kundërtën. Milani mundi Fiorentinën 2- 1 dje në "San Siro", falë golit të parë, por me shumë peshë të Deulofeut duke i mundësuar trajnerit Vinçenco Montela të ushqejë shpresën për t'u kualifikuar në kompeticionet europiane sezonin e ardhshëm.
45 minuta decizive
Trajneri kuqezi e njeh shumë mirë Fiorentinën, të cilën e ka drejtuar për shumë vite dhe ndjek akoma filozofinë e tij, teksa kërkon t'i imponojë lojën kundërshtarit. Në fillimin e lojës kuqezinjtë studiojnë ekipin që kanë përballë, por janë shumë të rrezikshëm sa herë që zbresin në sulm. Deulofeu ka një tjetër ritëm nga Sançez që e mbulon dhe spanjolli është futbollisti më i rrezikshëm në fushë për kuqezinjtë. Shkëndijën e parë të ndeshjes e jep Sosa me një goditje dënimi, ndërsa miqtë kundërpërgjigjen me Kristoforon dhe Borja Valeron, mirëpo në asnjë rast topi nuk përfundon në rrjet. Milani është i sistemuar mirë në fushë: pret kundërshtarin dhe provon ta ndëshkojë në befasi. Kjo ndodh në minutën e 16- të, teksa Sosa nga një goditje dënimi peshkon në zonë Kuçkën, i cili me një goditje me kokë nuk i jep shpëtim portierit Tatarusano. Përgjegjësia e golit rëndon mbi Astorin, të cilit i shpëtoi nga mbulimi mesfushori i Milanit. Mirëpo, Fiorentina nuk demoralizohet nga goli i pësuar, teksa nuk i jep mundësinë Milanit të qëndrojë në avantazh për shumë kohë. Në minutën e 20- të, Borja Valero peshkon Kiezën ( në pozicion të parregullt), i cili shërben brenda zonës për Kaliniç, që rivendos ekuilibrin në fushë. Milanit ky rezultat i qëndron "ngushtë" dhe për të gjetur sërish avantazh kërkon mbështetje te Deulofeu. Djaloshi i formuar në akademinë e Barcelonës nuk zhgënjen, me një goditje "bilardo" realizon një gol të shkëlqyer, të parin në Serinë A me fanellën e kuqezinjve. Kuqezinjtë, në fundin e pjesës së parë, kanë edhe mundësinë për të shënuar golin e tretë, mirëpo goditja brenda zone e Pasaliç stampohet në shtyllë.
Mbrojtja
Në pjesën e dytë, Milani
zbret me ide të qarta në fushën e lojës: vetëm mbrohet. Montela aktivizon lojtarë me tipare defensive si Zapata dhe Poli, duke larguar nga fusha Deulofeun dhe Sosën. Kuqezinjtë rezistojnë deri në minutën e 95- të duke e mbajtur të
paprekur portën e Donarumës në pjesën e dytë. Fitorja vlen trefish: për Europën, nxjerrin nga loja një rival direkt si Fiorentina dhe, mbi të gjitha, i japin lamtumirën e merituar në "San Siro" presidentit Silvio Berluskoni.