Trajneri i kombëtares, një fitore për 4 vite kontratë
Testi i radhës, kualifikueset e kampionatit botëror 2019
Trajneri i kombëtares shqiptare në basket boll për meshkuj, Antonis Konstantinides, rinovon kontratën deri në vitin 2021. Pas një vere mbresëlënëse në debutimin me përfaqësuesen kuqezi në eliminatoret e kampionatit europian 2017, qiprioti ka marrë sërish "bekimin" e Federatës Shqiptare të Basketbollit për të vijuar bashkëpunimin edhe për kualifikueset e "Euro 2021". Lajmi i akordit mes palëve është bërë publik nga faqja sportive "Cyprusbasket. net". Testi i radhës për kreun e pankinës shqiptare do të jenë kualifikueset e Kampionatit Botëror 2019, ku Shqipëria do të përballet me Holandën dhe Austrinë në Grupin B, ndërsa objektivi kryesor do të jetë "Eurobasket 2021". Trajneri do të zyrtarizohej në krye të
pankinës shqiptare më 11 mars të 2016-ës në prezencë të presidentit të Federatës, Avni Ponari, dhe sekretarit të përgjithshëm Korab Llazani. Ndërkohë Konstantinides i ka dhënë fund aventurës së tij me skuadrën greke të Kretës. Por, menjëherë pas zgjidhjes së kontratës me konsensus me presidencën greke, Konstantinides duket se nuk do të humbasë shumë kohë për të gjetur një tjetër stacion të karrierës së tij. Dhe tashmë mësohet se telefonatat në adresë të trajnerit 42-vjeçar nuk kanë munguar. Sa konfirmon "Cyprusbasket", tekniku i suksesshëm qipriot ka marrë dy oferta joshëse nga skuadra gjermane e Bundesligës, Rasta Vehta dhe rumunët e Kraiovës. Interesant është fakti se te skuadra gjermane Konstantinides do të ketë nën urdhrat e tij edhe basketbollistin e kombëtares sonë, amerikanin e natyralizuar Rashaun Boadus. Gjithashtu "Cyprusbasket" ka zbuluar se, për momentin, Konstantinides nuk do të nxitohet të hedhë firmën, pasi është në pritje të ofertave të tjera më të mira se këto të fundit. Konstantinides ka një karrierë të pasur si trajner, ndërsa në të kaluarën është shpallur kampion si në Qipro dhe në Kosovë në radhët e Sigal Prishtinës. Më herët njëshi i kombëtares shqiptare ka drejtuar skuadrat e Omonoias, "Phillips College", përfaqësuesen qipriote të U16-ës, ETHA Engomis, APOEL, CS Energia, Sigal Prishtina dhe së fundmi "Mbretërit" e Kretës.
Në "Euro 2017" - Në kualifikueset e fundit të Europianit, nën drejtimin e Konstantinides, Shqipëria do të arrinte edhe një fitore historike. Më 17 shtator të 2016-ës, në pallatin e sportit "Asllan Rusi", Shqipëria do të mposhtte Republikën Sllovake me rezultatin e përgjithshëm 72-65. Ndërkohë pesë takimet e tjera të Grupit F do t'i mbyllte me humbje.