Gol i parregullt dhe penallti e mohuar, Tirana: Dënoni arbitrin
Moviola, reklamohen një gol dhe penallti e mohuar
Derbi i kryeqytetit (i 148- ti) është sho qëruar sërish me polemika dhe kontestime për momente të veçanta. "Xhaketat e zeza" janë vendosur edhe një herë nën akuzë nga bardheblutë për momente, të cilat duhet të ishin vlerësuar ndryshe. Me anë të një reagimi në faqen zyrtare në rrjetin social "Facebook", KF Tirana ka reklamuar padrejtësitë e kryera nga kryesori Meta. Skuadra 24 herë kampione ka evidentuar momentin e minutës së 12- të për pozicionin jashtë loje të Malotës, pas krosimit të Trashit dhe atë të minutës së 25- të, kur Trashi prek topin me dorë pas krosimit të Merveil fare pranë arbitrit pas portave, Beqiri. Reagimi
"KF Tirana dënon në mënyrë të përsëritur gjykimin. Sot ( dje) Kridens Meta vendosi së bashku me ndihmësit e tij rezultatin e ndeshjes duke lejuar një gol të parregullt, mohuar një 11metërsh dhe ndikuar në mënyrë konstante kundër Tiranës. Nuk është rastësi që në dy vitet e fundit është akorduar vetëm një 11metërsh në 58 ndeshje, ashtu siç nuk është rastësi që të njëjtët gjyqtarë rikthehen për të vendosur atë që kanë paracaktuar. KF Tirana dënon publikisht gjithçka ka ndodhur sot (dje) në një ndeshje që nuk meritonte të mbyllej ashtu. KF Tirana do të kërkojë në Federatën Shqiptare dënimin e gjyqtarit Kridens Meta dhe ndihmësve të tij që sot (dje) përcaktuan humbjen", shkruhej në postimin e KF Tiranës shoqëruar me foto të dy momenteve në fjalë.
Ironia e fatit
Disa javë më parë, ishte Partizani që u ankua me të drejtë për një moment moviole. Në përballjen me Kukësin, Kaleb Ekuban ka realizuar një gol në pozicion dukshëm të rregullt, por për anësorin e atij takimi, sulmuesi i të kuqve është nisur në pozicion jashtë loje. Si për ironi të fatit, anësori në fjalë është i njëjti me atë të këtij derbi, Denis Rexha. Në momentin e ekzekutimit të goditjes së dënimit në minutën e 12-të nga Trashi, anësori Rexha nuk ka vënë re që Malota ka qenë në pozicion jashtë loje për të shënuar golin e avantazhit për të kuqtë. Ironi e fatit apo borxh i vjetër, moviola ka evidentuar tjetër gabim të rëndë në një ndeshje që arbitrohet nga gjashtë arbitra.