Sinella: Nuk kuptohej kush ishte i pari dhe i parafundit
Trajneri i Laçit: Lamë dy pikë me Kukësin
Trajneri i Laçit, Bledar Sinella, ndien keqardhje që skuadra e tij nuk arriti të fitonte ndaj Kukësit. Në prononcimin pas ndeshjes, Sinella theksoi se ekipi i tij la dy pikë. Madje, ai nuk ngurroi të ironizonte, duke deklaruar: "Nëse do të shikonte ndeshjen një që nuk njeh skuadrat e kampionatit shqiptar, nuk do ta kuptonte kush ishte në vend të parë dhe të parafundit. E kishim përgatitur shumë mirë ndeshjen dhe doli siç donim ne. E dominuam lojën në çdo drejtim. Më kënaq loja dhe shpirti i skuadrës, por në fund janë dy pikë të humbura që dhembin. Duke sulmuar, normalisht që do të rrezikosh edhe prapa".
Mungesa e golit
I pyetur për problemet në finalizim, Sinella pranoi se Laçi nuk ka një sulmues race, që shënon rregullisht. Aktualisht në përbërje të bardhezinjve qendërsulmues është vetëm Alush Kanapari, ndërsa lojtarët e tjerë janë më shumë të prirë për të luajtur nga krahët. "Për të marrë tri pikë mjafton edhe një gol. Ne vuajmë me rastet e humbura dhe duhet të përmirësohemi në finalizim. Edhe me Skënderbeun në Kupë shpërdoruam shumë. Sidoqoftë, jam i kënaqur me rezultatet dhe lojën që kemi zhvilluar në javët e fundit. Nëse vazhdojmë të luajmë kështu, edhe rezultatet e mira do të vijojnë. Na mungon një sulmues race, ndaj e ndërtojmë lojën pa një të tillë. Dalim mirë deri në portë, por duhet të përmirësohemi në goditjen e fundit",
ka thënë Sinella.
Besimi te mbijetesa
Trajneri i Laçit është i bindur se skuadra e tij nuk do ta diskutojë qëndrimin në Superiore. "Kemi pak alternativa nga stoli, plus që na kanë dëmtuar shumë edhe mungesat e Rajoviçit dhe Sefgjinit. Megjithatë, edhe me një grup të kufizuar lojtarësh, jam i bindur se mund ta përballojmë me sukses kampionatin. Këtë e treguam edhe sot ndaj një kundërshtari që kryeson kampionatin. Po të mos e dije renditjen, nga loja sot nuk mund të gjeje ndonjë dallim midis të dyja skuadrave", përfundoi deklaratën kreu i pankinës kurbinase.