Sot analiza, Mziu: Do të ketë masa, Sheta shkeli rregulloren
Takimi ndaj Vllaznisë shfaqi një sërë shqetësimesh për Korabin. Jo vetëm rezultati i ndeshjes, por edhe gjaknxehtësia dhe tensionet në dhomat e zhveshjes nuk do të kalohen pa u analizuar nga drejtuesit e klubit. Administratori Mziu, në një prononcim për "Panorama Sport", ka sqaruar se çfarë pritet të ndodhë nga drejtuesit dhe si do të rrjedhin ngjarjet. "Nuk ka asgjë publike pa u mbledhur stafi dhe lojtarët. Pritet që të kontaktojmë edhe me trajnerin Gerd Haxhiu, për t'u koordinuar me orën dhe vendin për të bërë analizën e ndeshjes duke shfrytëzuar dhe orarin e stërvitjes. Më tej, do të bëhen me dije edhe masat që klubi do të marrë për ata lojtarë, të cilët nuk janë impenjuar dhe nuk dhanë atë që pritej, sidomos në përballjen e fundit", është shprehur fillimisht Mziu. Lidhur me faktin nëse do të ketë masa disiplinore ndaj lojtarëve që dyshohen për mosimpenjim maksimal gjatë sfidës së fundit, ai është përgjigjur: "Sigurisht që do të ketë masa disiplinore për disa lojtarë. Megjithatë, këtë do ta diskutojmë me stafin dhe me vetë lojtarët. Nuk mund të justifikohen investimet e klubit duke mos u impenjuar gjatë ndeshjes, apo duke na lënë me dyshime, pasi disa lojtarë kanë aq aftësi dhe energji sa nuk i vënë në lëvizje dhe na lejojnë ne që të zhgënjehemi".
Incidenti - Për sa i përket incidentit me Shetën, drejtori Mziu u shpreh: "Deri tani, nuk do të ketë asnjë gjë publike pa u konsultuar me të gjithë lojtarët dhe me stafin teknik, për të vënë pikat mbi 'i'. Megjithatë, mund të them se ai ka shkelur kodin e etikës së klubit duke dalë në publik pa lejen e drejtuesve. Edhe për këtë rast do të ketë masa disiplinore, të cilat do të bëhen me dije pasi të analizojmë gjithçka brenda grupit të lojtarëve dhe vetë ne drejtuesve. Ne nuk na ndal askush t'i kërkojmë llogari gjithsecilit prej lojtarëve, në mënyrë që të jenë më të përgjegjshëm për ta mbyllur kampionatin me dinjitet. Veçse duhet të dini se asnjë vendim apo masë nuk do të merret me kokën time dhe as në gjaknxehtësi. Prandaj, nesër (sot) do të zhvillojmë një analizë të hollësishme, ku palët të jenë të qetë dhe aty bashkërisht do të vendosim dhe masat disiplinore", ka deklaruar Mziu për gazetën. Ekipi - Ndërkohë, skuadra do të nisë seancën stërvitore pasi të ketë përfunduar analiza dhe mbledhja mes stafit teknik, drejtuesve dhe vetë lojtarëve.