Bakaj-Heba, Vllaznia i gëzohet dyshes sulmuese
Elis Bakaj e Rubin Hebaj kanë qenë autorët e golave me ekipin e Korabit. Me këto dy gola ekipi shkodran ka marrë tri pikë të arta në këtë takim duke kaluar një pengesë të vështirë. Mirëpo, drejtuesit e klubit, përveç fitores së sigluar, kanë arritur të sigurojnë më në fund edhe një dyshe sulmuese që shton ndjeshëm besimin te forca e ekipit. Trajneri Cungu ka arritur të përshtatë me efikasitet eksperiencën dhe potencën e Bakajt, me talentin dhe freskinë e të riut Hebaj. Rezultatet e ndeshjeve të fundit, duke u bazuar te produktiviteti i këtyre lojtarëve, të japin të drejtë të besosh se janë një partneritet mjaft i suksesshëm. Në fakt, para merkatos së janarit, shkodranët kanë pasur jo pak probleme në repartin e avancuar, kur Cungu mundohej të përdorte elementë të ndryshëm për këtë repart. Gjithsesi, Bakaj po jep gjithnjë e më tepër garanci se mund të bëjë diferencën në kampionatin shqiptar, pavarësisht skepticizmit të shprehur në momentin e transferimit. Ndërsa Hebaj është një nga zbulimet e klubit shkodran, duke garantuar edhe të ardhmen e Vllaznisë.