Roshi "kërcënon" Shkumbinin me disfatë
Triumfi i arritur ndaj Tomorit ndryshoi pozicionin e Turbinës në klasifikim. Falë tri pikëve ndaj beratasve, cërrikasit lanë pas vendin e fundit të klasifikimit. Ky sukses konsiderohet pa dyshim meritë e gjithë grupit, ndonëse ata që spikatën ishin autorët e golave. Kapiteni Klevis Roshi dhuroi golin e qetësisë për skuadrën e Bardhit dhe tashmë është optimist edhe për sfidën e radhës. "Mendoj se kemi realizuar një fitore të merituar dhe mjaft të rëndësishme për vazhdimësinë. Të mposhtësh 2-0 Tomorin nuk është diçka e lehtë, por ne besuam dhe ia arritëm këtij qëllimi. Sigurisht që kjo është meritë e mobilizimit të të gjithë skuadrës, por edhe sportdashësve tanë që tashmë janë 'arma' jonë plus. Fatmirësisht takimin e radhës e kemi përsëri në shtëpi. Ndaj Shkumbinit do të jetë një tjetër mundësi ideale për të marrë tri pikët. Mendoj që edhe me peqinasit nuk kemi rrugë tjetër veç fitores", ka thënë Roshi, i cili është një prej lojtarëve me eksperience në ekip. Florenc Manari