Trajneri probleme me formacionin, mungon Lleshi

Elbasani ka startuar dje përgatitjet në kuadër të sfidës që do të ketë me Pogradecin në transfertë, me shpresën që të mos dalin pa një rezultat pozitiv nga kjo përballje. Situata nuk është aspak e mirë pas humbjes së fundit me Apoloninë, por tanimë në Elbasan janë mësuar me hapa falsë dhe sytë janë hedhur nga sfida e radhës. Ndoshta edhe një pikë mund t'u bënte punë verdhebluve, edhe pse me pozitat që kanë në klasifikim u bëjnë punë vetëm tri pikët. Për fat të keq, në këtë përballje elbasanasit do të kenë edhe një mungesë të sigurt, siç është ajo e mesfushorit Jurgen Lleshi, i cili ka mbushur numrin e kartonëve të verdhë dhe është i detyruar që të bëjë një javë stop. Në një situatë të tillë shtohen edhe më tepër hallet për teknikun Dosti, i cili duhet të hedhë sytë te ndonjë tjetër lojtar nga stoli për ta zëvendësuar. Me sa duket, problemet me afrimet në merkato po shfaqen këto javë te skuadra, sepse në tri takime ka marrë vetëm një pikë. Vladimir Mema