"Monako nuk do ndryshojë filozofi loje"

Leonardo Zhardim po përgatitet që të sfidojë ballëhapur Sitin e Guardiolës edhe pse "akti" i parë i betejës do të luhet në ishull. "Mendoj se do të gaboja rëndë nëse do të rekomandoja lojtarët që të bënin të tjera gjëra nga ato që kanë treguar deri më tani në Ligën e Parë franceze", e nisi fjalën e tij trajneri i monegaskëve. "Nuk ka rëndësi përballë kujt luajmë, ne kemi në ADN-në tonë këtë stil loje dhe do t'i qëndrojmë besnik deri në fund", vazhdoi portugezi. Këtë sezon Monako është treguar një makineri e vërtetë golash. "E vërteta është se do të jetë një ndeshje e bukur, pasi të dy teknikëve u pëlqen loja sulmuese", tha Zhardim.