Bonaventura kërkon kohë: Nuk jam gati për rikthimin

"Duhet durim. Rikthimi në fushë është akoma larg". Lajme jo të mira për Milanin, i cili në Udine, përveç ndeshjes, humbi edhe shërbimet e mesfushorit Xhakomo Bonaventura, lojtari më i mirë në këtë sezon. Ky i fundit, gjatë një interviste për "Premium Sport", ka thënë se po kryen fazën e riaftësimit, mirëpo ka nevojë ende për kohë për t'u rikthyer në dispozicion të trajnerit Vinçenco Montela. "Për momentin, ndihem mirë dhe jam shumë i lumtur për mënyrën se si po ecën faza e rikuperimit", tha fillimisht italiani. Bonaventura më tej shtoi: "Rruga e rikthimit është ende e gjatë dhe gjatë këtij muaji do të shohim se si do të vijojë riaftësimi. Fillimisht mendoj të shërohem dhe më pas të rikthehem në dispozicion të ekipit, por më duhet të qëndroj edhe disa muaj jashtë fushave të blerta". Bonaventura shtoi se dëmtimi nuk e ka demoralizuar: "Morali im është shumë i lartë, vetëm më vjen keq për faktin që nuk arrita dot t'i jap skuadrës ndihmën time në këtë moment deciziv të sezonit. Uroj dhe jam i bindur që ekipi do të kualifikohet për në kompeticionet europiane". Në fund, Bonaventura e mbylli intervistën duke thënë se: "Kundër Fiorentinës kemi luajtur shumë mirë, duke marrë në fund një fitore me shumë vlera. Fitorja ishte e merituar dhe tani duhet të mendojmë për të koleksionuar sa më shumë pikë, pasi kundërshtarët po mbajnë një ritëm të shkëlqyer dhe nuk duhet të frenojmë. Sigurisht kemi ende shumë pikë në lojë dhe ndeshje për ndeshje ekipi po tregon se është i vendosur dhe nuk dorëzohet kurrë. Baka? Vuan mungesën e golit, por jam i bindur se do të zhbllokohet shumë shpejt", tha ai.