Bauza, "shuplakë" Ikardit: Në kombëtare ai ose Alario

Komisari teknik i Argjentinës vazhdon që të habisë me deklaratat e veta rreth çështjes "Ikardi". Kësaj here ai u ka kujtuar tifozëve të dy herë kampioneve të botës se Mauro Ikardi ka rrugë për të bërë nëse do që të grumbullohet. "E di fare mire se argjentinasit janë shumë kureshtarë për të parë në aksion Ikardin. Unë them se të gjithë këto zëra që qarkullojnë nëpër media nuk më kushtëzojnë aspak. Unë i kam folur personalisht dhe i kam komunikuar se zgjedhjet e mia të para janë Gonzalo Higuain dhe Lukas Prato. Nëse njërit prej tyre i ndodh ndonjë gjë, atëherë Ikardi është në balotazh me Lukas Alarion", tha Bauza. Ky i fundit pak kohë më parë u tha gazetarëve se nuk e njihnin Praton kur flisnin me aq siguri për Ikardin.