Shqipëria organizon Botërorin e 2019-ës
Vendimi u mor pas takimit të presidentit Gjoza me kreun e IWF-së, Tamas Ajan
Federata Shqiptare e Peshëngritjes ka marrë OK-in për të pritur një tjetër eveniment ndërkombëtar. Fjala është për kampionatin botëror të 2019-ës për paratërinj. Verdikti final u dha pas takimit që një përfaqësi e Federatës Shqiptare e përbërë nga presidenti Elez Gjoza, presidenti i Nderit të FSHP-së Akademiku Gudar Beqiraj dhe sekretari i përgjithshëm Agron Haxhihyseni zhvilluan në selinë qendrore të Federatës Botërore (IWF) në Budapest. Në prezencë të titullarit të IWF-së Tamas Ajan, u vendos që Shqipëria të organizojë Botërorin pas dy viteve. Veç "bekimit" që morën nga Ajan për Botërorin, ai shprehu mbështetjen për Shqipërinë në bazë materiale si dhe në asistimin me ekspertë ndërkombëtarë në kualifikimin e trajnerëve në vend. Mes të tjerash, presidenti i Federatës Shqiptare të Peshëngritjes, Gjoza, u vlerësua nga Tamas Ajan me diplomën e "Organizatorëve të Meritës" për aktivitetet ndërkombëtare. Nëntorin e kaluar kreu i organizmit më të lartë të shtangës botërore do të vizitonte vendin tonë pas ftesës së palës shqiptare në ceremoninë ku u nderua figura e njohur e sportit dhe shkencës me ceremoninë të titulluar "Gudar Beqiraj, 50 vite jetë me peshëngritjen".
FUTBOLL PËR FEMRA/APOLONIA