Uolf e Lauda rinovojnë deri në vitin 2020
Mercedes ka hedhur themelet për të ardhmen, duke u bazuar te triumfet në edicionet e kaluara. Skuderia gjermane, pasi bëri të vetat shërbimet e pilotit finlandez Valteri Botas, në vend të kampionit të botës Niko Rosberg dhe drejtorit teknik Xhejms Alison, njoftoi ditën e djeshme rinovimin deri në vitin 2020 të dy "lojtarëve" kyç me shefin e skuadrës Toto Uolf dhe presidentin e nderit Niki Lauda. Me këtë zyrtarizim bien poshtë edhe zërat për një konflikt brenda familjes së kampionëve të botës me presidentin e skuadrës Dieter Zetshe, që doli me një deklaratë për shtyp, e shfaqur në faqen e internetit: "Cilësitë menaxheriale e sipërmarrëse të Totos, si dhe eksperienca e Nikit kanë dhënë rezultate që kanë shkuar përtej pritshmërive tona. Për këtë arsye jam shumë i lumtur që do t'i kemi edhe për katër vitet e ardhshme, sigurisht në krye të skuadrës së Formula 1".