"Diktature" e Partizanit
Bardheblutë thellojnë krizën, loja e mirë ndaj të kuqve nuk mjafton për të marrë pikë
Tension, polemika, gola dhe spektakël në tribuna dhe raste të diskutueshme. Derbi i kryeqytetit mes Partizanit dhe Tiranës i ka të gjitha brenda tij dhe një fund të lumtur për të kuqtë, të cilët, ndoshta nuk kanë bërë ndeshjen e tyre më të mirë, por kanë marrë tri pikë dhe kanë kënaqur tifozët që kishin mbushur shkallët e stadiumit. Nga ana tjetër, Tirana e Mirel Josës nuk është më e mira e viteve të fundit, megjithatë dje luajti futboll, madje në shumë minuta kontrolloi lojën, por mungesa e eksperiencës dhe një gol vazhdon t'i penalizojë bardheblutë, të cilët numërojnë një tjetër derbi pa fitore.
Pjesa e parë - Me dy skuadra që mendojnë më shumë për mbrojtjen u pa qartë se, përveç tribunave, spektakli në fushën e lojës do të mungonte, por këtë herë nuk do të mungonin golat. Partizani duket se e ka marrë lehtë takimin dhe nuk sulmon portën bardheblu. Megjithatë, një gabim i portierit Lika në minutën e tretë mund t'i kishte kushtuar shumë Tiranës. Por, pavarësisht se në këto minuta të para nuk bindin, të kuqtë janë kërcënues. Minuta e 7-të dhe Ekuban ul bukur me kokë për Fejzullahun, i cili nuk mendohet dy herë dhe gjuan fort në drejtim të portës së Likës, por traversa i mohon golin. Bardheblutë kontrollojnë mesfushën pas gabimeve të të kuqve, por mendojnë më shumë për prapavijën. Në një situatë të tillë, goli për skuadrën e Starovës nuk do të mungojë. Minuta e 12-të dhe Trashi, që dje u pa në pozicionin e mbrojtësit të krahut të majtë, kroson nga një goditje dënimi dhe Malota, i ardhur në ndihmë të sulmit, me kokë gjuan fort dhe e ndal topin në rrjetë. Të kota janë protestat e bardhebluve për një pozicion jashtë loje dhe janë të detyruar që ta rinisin takimin nga mesfusha. Pas shënimit të golit, loja e të kuqve bëhet e mërzitshme. Me Dajën, Takun dhe G.Likën, që janë edhe pikat referuese, bardheblutë bëjnë disa kundërzbritje të rrezikshme në portën e të kuqve. E tillë do të jetë ajo e minutës së 16-të, kur Taku sheh Cisen në zonën kundërshtare dhe nis një top për tek ai, duke e gjetur saktë. Por, gjuajtja e lojtarit të Tiranës devijohet nga dalja e Hoxhës dhe shkon në goditje nga këndi. Tirana dominon në fushë dhe vë jo pak në vështirësi mbrojtjen e kuqe, që është e detyruar vetëm të largojë topat. Mungesa e një sulmuesi te bardheblutë ndihet shumë në këto minuta të takimit, ndërsa pretendojnë edhe për një 11-metërsh pas një prekjeje të topit me dorë nga Trashi, që ndal gjuajtjen e Merveilit, por
kryesori Meta lejon vazhdimin e lojës.
Pjesa e dytë - Ndoshta askush nuk e priste, por Tirana e nis me gol pjesën e dytë. Gilman Lika nga këndi nis një top pa shumë pretendime, por pas daljes së gabuar të Hoxhës kthehet në asist për Teqjen
që me portën e boshatisur gjuan me kokë dhe nuk e ka të lehtë të shënojë. Festë e çmendur e mbrojtësit para tifozëve të Partizanit, që nuk janë shumë miqësorë. Starova sakrifikon Ramadanin për Cetkoviç, ndërsa në fillimin e takimit Mazrekaj i
ka lënë vendin Kalarit. Malazezi rezulton zëvendësimi i duhur, sepse vendos rregull në mesfushë, pasi arrin të lidhet mirë me Ekubanin dhe Torasën, ndërsa Trashi fiton duelet me Dokën. Të kuqtë nuk pajtohen me barazimin dhe duke shfrytëzuar lodhjen e Tiranës gjejnë sërish rrugën e rrjetës. Minuta e 71-të dhe Fejzullahu në ndihmë të sulmit shërben bukur për Torasën brenda zonës kundërshtare. Mesfushori shtatshkurtër lëviz bukur dhe jep një asist për Ekuban që fiton dyluftimin me Teqjen dhe gjuan saktë
duke shënuar një gol, të cilin e kishte kërkuar shumë. Goli i jep qetësinë stafit të kuq, ndërsa Josa hedh në fushë edhe Akuan, por Tirana e tij tashmë ndihet e lodhur dhe e ka të vështirë që të vendosë në vështirësi Partizanin, që gjithsesi mbrohet me forca të shumta dhe mundohet të shfrytëzojë kundërsulmin, por pa arritur të trefishojë. Në minutën e tretë shtesë, portieri Lika "braktis" portën dhe shkon në ndihmë të sulmit në një goditje dënimi, por gjuajtja e Turtullit me kokë është jashtë kuadratit, duke i hequr shansin Tiranës që të dalë me pikë nga derbi.