Zguro “merr krahun”: Të shtunën rikthehemi te fitorja
Mbrojtësi: Japim 120% ndaj Laçit
Vangjel Zguro ishte një nga goditjet e Luftëtarit në merkaton e verës. 23-vjeçari nga Pogradeci po luan si titullar prej katër ndeshjesh, duke zëvendësuar më së miri largimin e ish-kapitenit Mersini. Në prononcimin për "Panorama Sport", mbrojtësi i majtë flet për ndeshjen e humbur në Korçë, si dhe takimin e radhës me Laçin. "Ndaj Skënderbeut kemi humbur një takim, por jo gjithçka. Vuajtëm mungesën e lojtarëve titullarë në mbrojtje, ndërsa u ndëshkuam nga lojtarë kualitativë. Të harrojmë humbjen me Skënderbeun dhe të fokusohemi te ndeshja e radhës, duke qëndruar me këmbë në tokë. Luajmë ndaj një ekipi si Laçi, që është rivali direkt në luftën për mbijetesë. Në fushë do të japim 120% të kapacitetit tonë, pasi kundërshtari, edhe pse ndodhet në pozita jo të mira, është një kockë e fortë, që nuk kalohet lehtë. Me mbështetjen e tifozërisë, si dhe me punën sistematike që do të bëjmë në ditët e mbetura, besoj dhe shpreh bindjen se do të rikthemi te fitorja", ka thënë fillimisht Zguro. I pyetur se çfarë e bindi të zgjidhte Luftëtarin pas ofertave
që pati kur u largua nga Korabi, pogradecari u shpreh: "U bëra pjesë e Luftëtarit në merkaton e janarit, pasi ky klub drejtohet nga njerëz profesionistë e për më tepër korrektë. Brenda grupit të lojtarëve ka harmoni dhe të gjithë janë në mbështetje të njëri-tjetrit në funksion të rezultateve
pozitive. Çelësi i sukseseve të Luftëtarit, të ndërtuar mbi boshtin e skuadrës së sezonit të kaluar, mendoj se është grupi dhe përgjegjshmëria për kryerjen e detyrës në fushë. Jam i lumtur që kontribuoj në këtë skuadër me histori". Tomor Shehu