Bruka, i “dorëzuar”: Mendojmë vetëm për ndeshjen ndaj Burrelit

Trajneri i lezhjanëve lë dy ditë pushim skuadrën

Pas barazimit me Kamzën, ndeshje e cila përfundoi në barazim, trajneri Bruka ka lënë pushim dy ditë futbollistët e tij, që të rikuperojnë energjitë pasi kanë pasur një periudhë të ngjeshur edhe me takimet e kampionatit. Tashmë që po i vjen fundi edhe fazës së dytë të kampionatit, do të përcaktohen dy minigrupet që do të ndeshen mes tyre, ku pesë të parat do luftojnë për ngjitjen në Superiore dhe pesë të dytat ekipet që do të mbijetojnë. Lezhjanët tashmë e ka siguruar pesëshen e parë, por kanë një diferencë të dukshme, prej 10 pikësh me kreun që mbahet nga Kamza. Duke iu referuar dy sfidave të mbetura të fazës së dytë, Besëlidhja jo vetëm matematikisht, por edhe realisht beson në ngjitjen e saj në Kategorinë Superiore. Ndonëse në supersfidën e së dielës ndaj Kamzës nuk arritën që të shënonin, kësisoj të merrnin tri pikët e dëshiruara, përsëri në kampin lezhjan të futbollit ka entuziazëm.

Deklarata - Trajneri Alban Bruka do ta grumbullojë ekipin sot për të nisur stërvitjen në kuadër të javës së 17të të kampionatit ku do të presin në shtëpi Burrelin. “Tashmë që edhe fazës së dytë po i vjen fundi, kampionati sa vjen e bëhet më i fortë nga të gjitha pikëpamjet, ndaj tani nis edhe lufta e vërtetë për objektivat. Ne e kemi shprehur edhe praktikisht se Besëlidhja është skuadra që i përket Superiores, këtë e kemi treguar edhe në Kupë, ku jemi rreshtuar në katër skuadrat më të mira të këtij kompeticioni Superioreje. Për momentin, jemi të përqendruar totalisht në përgatitjet për ndeshjen e radhës ndaj Burrelit, pasi nuk na lejohen hapat falsë. Ndërsa në lidhje me objektivat e tjera që skuadra ka në këtë sezon, do të flasim hap pas hapi”, ka thënë trajneri Bruka. Drejtuesit e Besëlidhjes kanë konfirmuar se Kupa e Shqipërisë mbetet objektiv kryesor i skuadrës për sezonin e ardhshëm. Preng Gjikola