Siti, ‘manita e çmendur’ Monakosë
Dopieta të Agueros dhe Falkaos, paraqitje befasuese e skuadrës së Leonardo Zhardim
Ndeshje e pabesueshme! Ndodhi gjithçka brenda 90 minutave: përmbysje, kundërpërmbysje, dopieta, gafa, penallti të akorduar, penallti të shpërdoruar dhe penallti të munguar. Për sportdashësit ka qenë një emocion i fortë, prej spektaklit të dhuruar, ndërsa për tifozët e Mançester Sitit e Monakosë ka qenë një "atak kardiak". Në fund, anglezët triumfuan 5-3, në një sfidë që ishte e pamundur të bëje parashikime prej ritmit të çmendur. Aguero, që nuk shijonte festën e golit që prej 6 janarit, udhëhoqi ekipin e tij te fitorja me dy gola dhe një asist, duke hequr edhe hijet e dështimit mbi Pep Guardiolën...
Pjesa e parë - Mjaftuan pak minuta për të kuptuar se do të ishte një mbrëmje për t'u shijuar gjatë. Një presing i vazhdueshëm i lojtarëve të Monakosë, të cilët detyruan vendësit që të gabojnë në mënyrë të vazhdueshme në pasime. Energji fizike dhe cilësi në repartin e avancuar për miqtë, të cilët "flirtuan" në dy raste të njëpasnjëshme me golin e avantazhit. Gjithsesi, në momentin e vet më të vështirë, Mançesteri shkundi i pari rrjetën e kundërshtarit, kur Sterling shtyu lehtësisht topin pas një asisti të Sane. Por, kjo nuk e zbehu aspak frymëzimin e djemve të Leonardo Zhardim, të cilët prishën menjëherë festën e anglezëve. Radamel Falkao me kokë dhe talenti Mbape me një goditje potente brenda zonës përmbysën gjithçka që në pjesën e parë. Një avantazh shokues, por i shoqëruar edhe me kontestime të ashpra ndaj arbitrit Lahoz. Ky i fundit u mohoi një penallti vendësve, që bëri edhe Guardiolën të dalë nga natyra e tij e qetë në pankinë.
Pjesa e dytë - Mbrëmja mund të ishte një makth për vendësit, nëse Falkao do të shënonte nga pika e bardhë e penalltisë, pesë minuta pasi rizbritën në fushë. Ishte Kabajero ai që u dha kurajë, me pritjen e tij dhe Aguero reagoi duke barazuar rezultatin në të 58-ën. Por, ishte sërish Radamel Falkao që do heshte të pranishmit në "Etihad Stadium", kur shënoi golin e tretë për Monakonë, pas një finalizimi mahnitës me një gjuajtje në formë parabël. Do të ishte gol i denjë për të mbyllur mbrëmjen, por jo për Sitin. Aguero barazoi gjithçka në të 71-ën, kur gjuajti fluturimthi një krosim nga goditja e këndit, duke u hapur rrugën golave të Stons dhe Sane, në një nga kundërpërmbysjet më të çmendura të Mançesterit. Nga
një ekip që rrezikonte ndjeshëm eliminimin, në një skuadër që do të shkojë në transfertë me avantazhin e dy golave. Gjithçka spektakolare në "pjesën e parë", të një dueli që pritet të jetë akoma më emocionues edhe në "pjesën e dytë", në shtëpinë e Monakosë...