Lekaj: Ndaj Apolonisë nuk do ta kemi të lehtë
Trajneri i shkodraneve kërkon impenjim maksimal
Vllaznia e ka të qartë objektivin: kërkon fitimin e Kupës së Shqipërisë. Për trajnerin e Vllaznisë, Nikolin Lekaj, gjithçka është gati dhe përballja ndaj Apolonisë pritet me interes. "Natyrisht që e presim me interes këtë ndeshje. Vllaznia prej kohësh është bërë gati dhe pret me qetësi finalen e Kupës. Skuadra jonë prej një jave ndodhet e grumbulluar dhe vajzat janë përqendruar maksimalisht te kjo ndeshje. Patjetër që jo vetëm futbollistet, por edhe ne si staf teknik dhe vetë presidenti i kanë kushtuar vëmendje finales së Kupës, sepse është një trofe dhe një objektiv i rëndësishëm për ne. Është një sfidë të cilën as nuk e kemi nënvlerësuar dhe as nuk e kemi mbivlerësuar, por i kemi kushtuar vëmendjen që meriton. Ne çdo ndeshje e shohim në këtë mënyrë, sepse në të kundërt do të kishim gabuar. Apolonia nuk është rastësisht në finale, ndërsa është një ekip që ka njohur rritje këto kohët e fundit", shprehet trajneri Nikolin Lekaj. Sipas teknikut Lekaj, ekipi i tij është përgatitur intensivisht në seancat stërvitore për të arritur fitimin e trofeut. "Vajzat ndodhen në një gjendje të mirë sportive dhe krejtësisht të gatshme për sfidën finale ndaj ekipit fierak. Përveç aspektit fizik, një vëmendje i është kushtuar edhe lojës taktike e teknike për të arritur fitimin e ndeshjes finale ndaj Apolonisë. Patjetër që Vllaznia ka eksperiencë më shumë se të gjitha ekipet në ndeshja të tilla, por kjo s'do të thotë
asgjë për ne, përkundrazi, na bën që të punojmë më shumë. Sa u përket dëmtimeve të mundshme, nuk kemi probleme dhe ekipi është i plotë në prag të përballjes finale me Apoloninë", shprehet tekniku Lekaj. I pyetur nëse Vllaznia e ka të lehtë këtë përballje, Lekaj nuk mendon në këtë mënyrë. Senad Nikshiqi