Shorti i Ligës së Europës, Roma “peshkoi” Lionin
Dje, në Zvicër u zbardhën çiftet e 1/8-ave
Liga e Europës ka njohur dje edhe çiftimet e raundit të 1/8ave, të cilat do të ofrojnë jo pak emocione. "Goglat" nuk kanë qenë me shumë fat për Romën, por edhe për Lionin, që shiheshin si dy ndër favoritet për suksesin final, duke parë udhëtimin e tyre deri në këtë pjesë të kompeticionit. Skuadra e Luçiano Spaletit do të gjejë përballë francezët, të cilët kanë marrë zjarr në këtë fazë të dytë të sezonit, aq sa në këtë raund erdhën duke shënuar 11 gola në 180 minuta përballë holandezëve të AZ Alkmar (4-1 në Holandë, 7-1 në Francë). Këto dy ekipe rikthehen të ndeshen mes tyre
pas plot 10 vitesh në Europë. Në vitin 2007, Roma dhe Lioni u përballë në 1/8-at e Ligës së Kampioneve, me ndeshjen e vajtjes së luajtur në "Olimpiko", e cila përfundoi 0-0, ndërsa dueli i kthimit pa italianët triumfues, 2-0, me gola të Totit dhe Mansinit, por edhe pse kaluan më tej, verdhekuqtë
u eliminuan në çerekfinale nga Mançester Junajtid. Pikërisht duke qëndruar te "Djajtë e kuq", për ta shorti ka qenë më fatlum, pasi përballë do të kenë rusët e Rostovit, një skuadër që kurrsesi nuk duhet nënvlerësuar, duke parë ritmin fantastik të nënkampionëve të Rusisë. Gjithsesi, Ibra me shokë kanë një tjetër nivel dhe një eksperiencë shumë më të madhe, prandaj shihen si favoritë për t'u kualifikuar dhe për t'i shkuar deri në fund Ligës së Europës. Por edhe duelet e tjera janë mjaft interesante dhe pritet të dhurojnë mjaft emocione, sidomos derbi gjerman mes Shalkes dhe Mynshengladbahut, por edhe ai belg, i cili do të vërë përballë njëri-tjetrit Gentin me Genkun. Olimpiakos-Beshiktash ndoshta do të jetë dueli më i zjarrtë, sepse tifozeritë e tyre të mahnitshme do të kenë një motiv më shumë për të qenë edhe më të ekzaltuar dhe më kërkues ndaj kualifikimit respektiv, duke njohur edhe faktin se mes grekëve dhe turqve, rivaliteti është historik dhe nuk po flasim për atë sportiv, por sidomos për atë etnik e politik. Ndërkohë, duelet e tjera që kompletojnë 1/8-at janë Selta Vigo - Krasnodar, APOEL - Anderleht dhe FC Kopenhagen - Ajaks.