“Skaneri” i blerjeve, ja pse zhgënjen Barcelona

Statistikat, Umtiti është i vetmi lojtar që rezulton i suksesshëm

Barcelona po kalon një moment mjaft të vësh tirë në rezultate, duke qenë në vendin e dytë në kampionat dhe thuajse e eliminuar nga Liga e Kampioneve që në 1/8-at. Pjesëmarrja në finalen e Kupës së Mbretit nuk mund të përdoret kurrsesi si justifikim për një klub si katalanasit, ndërkohë që trajneri Luis Enrike duket se është në muajt e tij të fundit në krye të detyrës. Në fillim të edicionit, pasi u bënë disa afrime në merkato, ai tha: "Kam organikën më të mirë në botë. Nuk mund ta kisha shpresuar një skuadër më të kompletuar se kjo. Jam shumë i kënaqur". Në atë periudhë mund t'i jepje të drejtë, pasi çdo pozicion u dublua me një blerje cilësore, duke shpenzuar deri në 50 milionë euro për një lojtar të vetëm. Por, duket se gjithçka ka rezultuar një mbivlerësim emocional mbi kapacitetin e atyre që veshën fanellën e gjigantëve iberikë. Pesë prej goditjeve u programuan të ishin kandidatë seriozë për formacionin dhe në fakt u është dhënë shpeshherë mundësia për të luajtur, por nuk kanë treguar për asnjë moment se janë brenda pritshmërive. Në një analizë të bërë, duke i krahasuar me lojtarët që pritet të zëvendësonin, kanë rezultuar shumë më të dobët. Pra, një investim totalisht i gabuar, që i ka dhënë edhe ndikimet në rezultatet negative të kohëve të fundit. Andre Gomes ishte ai që mori më tepër vëmendje kur u transferua te Barça, pasi po kalonte një moment të shkëlqyer te Valencia dhe në marrëveshjen për kartonin e tij klauzolat e çojnë

çmimin deri në 50 milionë euro. Gjithsesi, ndeshja kundër PSGsë tregoi qartazi se nuk është gati për një klub të tillë. Në statistikat "kokë më kokë" ndaj Serxhi Busketsit, portugezi është inferior në të gjitha disiplinat. E njëjta situatë është edhe për Denis Suarezin, i cili është alternuar shpeshherë me Ivan Rakitiçin. Dy herë më pak rikuperime topi sesa kroati dhe larg shpërthimit që kishte në edicionin e kaluar. Gjithsesi, dështimi më i madh mund të konsiderohet Pako Alkaser. Ai goleadori që u kthye në "makthin" e kundërshtarëve një vit më parë kur luante me Valencian, u shndërrua në hijen e vetvetes në Katalunjë. Finalizim i dobët, tentativa të dëshpëruara për të shënuar, pak rikuperime topi, të cilat mjaftojnë për ta kthyer atë nga një blerje 30 milionëshe, në një zëvendësues të padëshiruar. Madje, me shumë mundësi do largohet që në verën e ardhshme, pasi edhe shpresat se ai do e rrisë nivelin e tij janë me të vërtetë të pakta.

Përjashtimi - I vetmi që ka arritur të tregojë se mund të ulë në stol "rivalin" për një vend në formacion është Samuel Umtiti. Francezi mund të konsiderohet një afrim i suksesshëm dhe një partner i mirë i Pikesë, duke bërë që Maskerano shpeshherë të ndjekë ndeshjet nga pankina. Pothuajse në të gjitha statistikat, 23-vjeçari është më i mirë se argjentinasi, si në saktësinë e pasimeve apo në duele të fituara. Por, vetëm një bilanc pozitiv, nga shumë përforcime të kryera, bën që të vënë në diskutim edhe të ardhmen e drejtorëve të klubit...