Smajlaj kampion i Ballkanit, e bën festë në Serbi
"S kishte kënaqësi më të bukur se të oje lart flamurin shqiptar në Beograd"
Izmir Smajlaj magjik! Kampion Ballkani dhe rekordmen kombëtar. Triumfi i dyfishtë i atletit shkodran erdhi nga kampionati i 22-të ballkanik i sallave të mbyllura të zhvilluar në Beograd të Serbisë. Shtatlarti i kërcimit së gjati respektoi parashikimet duke u ngjitur në majën më të lartë të podiumit duke siguruar medaljen e artë me rezultatin final 7.98 metra nga 7.67 m që ishte rekordi i mëparshëm i mbajtur nga Admir Bregu. Pikërisht titulli kampion u vendos në provën finale pas hedhjeve 7.77, 7.64, 7.80 dhe 7.79 metra. Me një performancë fantastike, shqiptari la pas vetes në podiumin ballkanik atletin rumun Andrei Neagoe me rezultatin 7.82 m dhe grekun Miltiadis Tentoglou me 7.48 metra. Smajlaj u klasifikua i pari mes 19 konkurrentëve në këtë garë. Një paraqitje model e atletit shkodran dhe trajnerit të tij Vildan Tufi që vetëm pak ditë më parë patën premtuar një triumf të tillë dhe ia dolën mbanë. Ky ishte testi i parë i Smajlajt i mbyllur në mënyrën më të mirë të mundshme përpara kampionatit të 34-t europian në sallat e mbyllura që zhvillohet po në Beograd në "Kombank Arena" ku edhe atje shkon me ambicie. Kjo ishte medalja e vetme e fituar nga Shqipëria në kampionatin ballkanik. Dje, në pistën serbe zbritën edhe dy tre atletët e tjerë kuqezinj. Në 800 metra, atletja 16- vjeçare Relaksa Dauti u rendit e 10-ta në finale (e fundit) me kohën 2'18"95. Ndërsa atleti Eraldo Qerama bëri një paraqitje të kënaqshme në 800 metra, ku me kohën 1'52"82 në renditjen e përgjithshme u rendit në vendin e 6-të mes 12 atletëve pjesëmarrës. Në garën e 60 metrave, atleti Bajram Muço u rendit në vendin e 17-të në klasifikimin e përgjithshëm, duke dhënë kohën 7"08. Ai garoi edhe në 60m}p ku u rendit i gjashti mes 10 konkurrentëve me kohën finale 8.26 sekonda.
Deklarata- Mes emocioneve, Smajlaj u shpreh se e kishte parashikuar një rezultat të tillë. Në një prononcim për gazetën "Panorama Sport" vetëm pasi u dëgjua himni shqiptar në arenën e Beogradit, Smajlaj u shpreh: "E dija që kisha për ta finalizuar në këtë mënyrë. Përfitoj nga rasti të falënderoj trajnerin dhe fizioterapistin Ilirian Haxhaja për këtë arritje. Nuk kishte kënaqësi më të bukur se sa të çoje lart flamurin shqiptar në mes të Beogradit", u shpreh Smajlaj.