“Zhduken” drejtuesit, tifozët kapen me Muzakën
Në një ndeshje që u ndoq nga vetëm 230 tifozë, shpesh dëgjoheshin më shumë zërat e lojtarëve në fushë, sesa të atyre që ishin në shkallët e stadiumit. Një grup ultrasish të ardhur nga Korça mbështetën skuadrën deri në fund, ndërsa ata pak shkodranë që ndodheshin në tribunën qendrore më shumë kontestuan Vllazninë. Nisur edhe nga sensi i humorit që karakterizon shkodranët, në jo pak raste pati ironi me Gjergji Muzakën, por edhe lojtarët e tjerë të Skënderbeut. Nga ana tjetër, dje, si kurrë më parë, drejtuesit e Vllaznisë nuk u panë në hollin e stadiumit, duke u "zhdukur" menjëherë pas ndeshjes.
Takimi - Pak minuta pas përfundimit të takimit, mbrojtësi i Vllaznisë, Endri Vrapi, i cili dje mungoi për shkak kartonësh, ka qëndruar disa minuta në hollin e stadiumit për të takuar trajnerin e Skënderbeut, Ilir Daja. Vrapi është përshëndetur përzemërsisht me trajnerin kryeqytetas, duke e uruar edhe për fitoren e arritur.
Ironia - Gjergji Muzaka u bë shënjestër e tifozëve. Në disa raste mesfushori i vërshëllye, por pati edhe momente kur u ironizua nga tifozët dhe ilariteti nuk mungoi. Duke qenë se lojtari tiranas do të bëjë farmacistin pas lënies së futbollit, një prej tifozëve në tribunë tha: "Na dha Muzaka një valium, aq sa me na vu në gjum". Drejtuesit - Drejtuesit e Vllaznisë, si rrallëherë, dje nuk kanë qenë të pranishëm në hollin e stadiumit "Loro Boriçi" pas përfundimit të takimit. Si administratori Astrit Gjyrezi, por edhe drejtori sportiv, Eugent Zeka u larguan menjëherë nga stadiumi pas ndeshjes. E njëjta gjë ndodhi edhe me lojtarët dhe pjesëtarët e stafit teknik të Vllaznisë. Në ndryshim nga e kaluara, kur korçarët kanë fituar në Shkodër, këtë herë te vendësit humbja duket se është ndier më shumë. Trajnerët - Edhe pse thuajse gjatë gjithë ndeshjes pati reshje shiu, trajneri Ilir Daja qëndroi në këmbë për të udhëzuar skuadrën, duke marrë edhe masa, pasi kishte vendosur një kapuç në kokë. E njëjta gjë ndodhi edhe me Armando Cungun, që nuk e ndjeu aspak shiun. A.U.