Starova beson te një ekip i ekuilibruar në Kukës

Përgatitjet e Partizanit për transfertën e Kukësit janë karakterizuar nga një klimë e ngrohtë, duke ditur se pas fitores në derbi është përmirësuar harmonia në grup. Gjatë mesditës së djeshme, të kuqtë u kanë dhënë dorën e fundit përgatitjeve për transfertën e Kukësit, ku trajneri Starova ka punuar kryesisht në aspektin tekniko-taktik. Kërkesa e "Bobit" për këtë takim është që në fushën e stadiumit "Zeqir Ymeri" të shikojë një skuadër e ekuilibruar, që di t'i bëjë mirë detyrat si në aspektin mbrojtës, por edhe në sulm. Mbrojtja ka shfaqur probleme në ndeshjet e fundit dhe gjatë kësaj jave është punuar shumë në riparimin e defekteve. Në këtë pjesë të dytë të kampionatit, të kuqtë kanë bërë ndryshime të vazhdueshme në mbrojtje, por ende nuk është kthyer soliditeti në këtë repart. Gjatë seancës së fundit, stafi ka punuar disa skema loje, ku goditjet standarde shpresohet që të japin rezultat, por shpresat mbeten edhe te kundërsulmi i shpejtë me protagonist Ekuban. Vëmendje i është kushtuar edhe fazës mbrojtëse, kryesisht nga goditjet standarde të kundërshtarit.