Mazrekaj nuk stërvitet, por udhëton me ekipin

Mentor Mazrekaj nuk është përgatitur me ekipin në dy ditët e fundit, kështu që ai pritet që të mos jetë titullar në transfertën e sotme në Kukës. Të premten lojtari u largua nga stërvitja dhe seancën e ndoqi nga shkallët e tribunës së kompleksit në Pezë. Lojtari e ka pranuar se nuk gëzon formë të mirë, ndaj ai ka pohuar se do t'i bashkohet grupit kur të jetë gati. Edhe gjatë seancës së djeshme ai ka qenë larg përgatitjeve të skuadrës. Dje, lojtari ka kryer disa ekzaminime mjekësore për të parë gjendjen e tij, pasi dihet se vjen pas një mungese të gjatë. Mësohet se Mazrekaj nuk është ende në 100% e tij dhe distancimi i fundit me skuadrën ka ardhur pikërisht për shkak të problemeve që i dalin herë pas here nga operacioni i kryer në kaviljen e këmbës së djathtë. Ndonëse Mazrekaj nuk është përgatitur me ekipin në dy ditët e fundit, ai sërish ka udhëtuar me ekipin drejt Kukësit. Shpresohet që mosprania e tij në seancat e fundit të ketë ardhur, realisht, për shkak të formës fizike dhe jo kontradiktave me stafin. Nuk përjashtohet mundësia që të jetë edhe ndonjë lëvizje mashtruese e të kuqve para Kukësit.