Barleti Volej bën “të fortin” në derbin e kryeqytetit
Barleti Volej vazhdon të diktojë kampionatin e femrave në Grupin A1, teksa dje hipotekoi fitoren e 10-të në po kaq takime të luajtura. Kampionet e trajnerit Hasan Gurabardhi mposhtën në derbin e kryeqytetit 3-0 Tiranën në "Fahrie Hoti", në fundin e një ndeshjeje emocionuese në çdo sulm të sajin. Barleti Volej vinte në këtë sfidë me dy mungesa të rëndësishme, si Xheka dhe Picaku. Ndeshja luhet në ekuilibër të plotë deri në pikën e 11-të, kur Bego me dy shërbime radhazi i jep avantazhin e pjesshëm 15-11. Kjo luhatje në lojë e bardhebluve sjell edhe pushimin e parë për to. Tuci, një nga më të mirat dje për barletaset, vulos pikën e 16-të. Por Tirana nuk heq dorë dhe bën një rikuperim "flash" me Palokën si lidere. Tekniku i kampioneve sheh një shthurje të skuadrës dhe thërret një pushim. Xhelilaj është e saktë nga shërbimi dhe u jep epërsinë e 5 pikëve (20-15) kampioneve. Kapitenia Braho, e mrekullueshme dje në derbi, finalizon pikën e 22-të në limitet e zonës (22-16). Vajzat e trajnerit Gorenxa përgjigjen me Kushin që rihap ndeshjen në - 2 pikë. Fundi bëhet dramatik me një seri barazimesh dhe në pikët shtesë 28-26 fiton Barleti Volej. Me fillimin e setit të dytë, Tirana reziston vetëm 3 pikët e para. Hasku bën përmbysjen e radhës me dy shërbimet e shënuara radhazi dhe pushimi i parë teknik e gjen Barleti Volej nën udhëheqje 8-4. Vendëset rigjejnë forcat e me Xhixhën nga shërbimi dhe pikët e falura nga Barleti i çojnë shifrat në 7-9. Barleti Volej është gjithmonë para, por jo në një rezultat luksi. Paloka shkarkon të djathtën dhe mban ende Tiranën në lojë (17-19). Është sërish Kushi që bëhet protagoniste me dy finalizime, duke shtuar shpresat për Tiranën, por Hasku vulos pikën e fitores së setit 25-20. Edhe pse e nis ters setin e tretë 2-5, bardheblutë bëjnë rokadën me Xhixhën dhe Metën nga shërbimi 7-5. Në këtë moment, Barleti Volej është totalisht i shpërqendruar, çka sjell edhe irritimin e trajnerit. Për Barleti Volej bëhet "malore" 12-7. Por me një super-Braho, pa harruar edhe korçaren Bego nuk ka "mision të pamundur". Barleti Volej gjen barazimin në pikën e 14-të. Ajo që u jep fund shpresave të Tiranës është sërish Bego, që hipotekon suksesin e radhës. Fiton edhe Teuta 31 me Vllazninë vendase. Fiton edhe Partizani, që ndodhet në vendin e tretë, i shkëputur nga ndjekëset. Të kuqtë mposhtën 3-0 Lushnjën në "Asllan Rusi", një ndeshje ku kryeqytetaset e nënvlerësuan kundërshtarin në setin e parë. Te meshkujt "refreni" është i Partizanit. Të kuqtë fituan me lehtësi 3- 0 ndaj Elbasanit. Te Partizani debutoi dje edhe venezueliani Luiz Meza. Fitore të vështirë arriti në "Fahrie Hoti" Tirana, që mundi 3-1 Erzenin (25-20, 19-25, 25-23, 25-22), dy ekipe rivale dhe që synojnë një vend në "play off". Rikthehet te fitorja Teuta. Durrsakët mposhtën dje 3- 0 Skënderbeun. Skuadra e drejtuar nga trajneri Leonard Marangoni tregoi nivel më të lartë loje dhe falë dëshirës e organizimit në detaje, regjistruan një fitore me shumë vlera.
O.Serani/S.Nikshiqi/R.Gjini