endohen “rebelët” e Elbasanit, tre sportistë rikthehen në skuadër

Tre basketbollistët e klubit të Elbasanit, të cilët ishin organikë e skuadrës gjatë fazës së parë të kampionatit, por gjatë pushimeve ngritën krye duke kërkuar largimin e trajnerit Banush Sinani, janë rikthyer sërish pjesë e skuadrës. Burime të "Panorama Sport" pranë klubit konfirmojnë se Xhino Leka, Eljor Mata dhe Xhanluka Balliu, i kanë kërkuar falje trajnerit dhe kanë pranuar që të punojnë në kushtet që ka vendosur trajneri. Mësohet se këta basketbollistë janë penduar për veprimin që kanë bërë, ndaj tani mund të konsiderohen si "përforcime" të reja të ekipit të basketbollit të Elbasanit. Për rikthimin e tyre në skuadër është bërë një mbledhje nga ana e trajnerit Sinani dhe pas konfirmimit të marrë nga zyrtarët e klubit, ata tani kanë filluar zyrtarisht edhe stërvitjen me pjesën tjetër të skuadrës. Para pak javësh, numri i "rebelëve" që kërkonin shkarkimin e trajnerit të ekipit ishte nëntë, por katër prej tyre janë rikthyer sërish në skuadër, ku përpara kësaj tresheje, i pari që u rikthye ishte sportisti Jugert Koçiasi. Tani, me kompletimin disi të skuadrës, verdheblutë shpresojnë për më shumë rezultate pozitive, madje që në ndeshjen e kësaj jave ( të martën, e prapambetur e javës së 14-të) me Skënderbeun në Korçë, ku këta lojtarë pritet të jenë në fushë. Këtë sezon verdheblutë shpresonin te ngjitja në Superiore, por problemet e shumta bënë që të dilnin jashtë objektivave. Vladimir Mema