Kukësi dhe Partizani, “luftë” për një pikë
Dhunë mes tifozëve dhe policisë. Sherr edhe në tribunën VIP, pati tentativë për të goditur drejtuesit e klubit të kuq me sende të forta
Kryendeshja e javës së 23- të Kukësi-Parti zani, e zhvilluar në stadiumin Zeqir meri , u mbyll me rrjeta të paprekura. Ky rezultat i ka vlejtur më shumë rivalit të dy ekipeve, Skënderbeut, i cili është barazuar në krye me Kukësin. Të kuqtë e kryeqytetit ruajtën distancën katërpikëshe me kreun, i cili tashmë është me dy koka, por Kukësi është i pari me golavarazh më të mirë, si dhe superior në përballjet direkte. Hyrja falas e tifozëve bëri që takimi të zhvillohej në një atmosferë elektrizuese, bukuria e të cilët u prish në pjesën nga incidentet e ndodhura me tifozët e Partizanit, ku pati të lënduar dhe dëme materiale në stadium. Emini ka qenë i pafat, pasi iu anulua një gol, si dhe një rast e ndal shtylla. Për mënyrën si rrodhi loja, barazimi është rezultati më i drejtë. Në 60 minutat e para, Partizani ishte më kërkues se vendasit, të cilët, pas incidentit me tifozët, mori superioritetin në fushë, por pa arritur të shënojë. Në këtë takim dalloi mesfusha e Partizanit, e cila u tregua e palodhur duke neutralizuar vendasit në këtë sektor. Edhe mbrojtjet e të dy kampeve u treguan të sakta, duke mos u dhënë mundësi sulmuesve, që janë nga më të mirët e Superiores. Kukësi e nisi si pritës lojën e tij, ndërsa Partizani i Starovës tregoi ekuilibër në fushë, ku shikohej harmonia mes reparteve, por pa mundur që të gjejnë hapësirën e duhur në finalizim. Ekuban pati një mbulim të zgjeruar, ku në çdo rast kishte pranë 2-3 lojtarë, ndërsa Renato Malota e bëri shumë mirë punën në neutralizimin e Pejiçit. Takimi i djeshëm ishte më shumë një duel i skemave taktike të dy trajnerëve, që më shumë kishin menduar të mos e humbisnin këtë takim.
Pjesa e parë- Që në fillim të ndeshjes u pa qartë se dueli më i madh do të kryhej në mesfushë. Ramadani, Batha dhe Vila ishin më superiorë se vendasit, ku dukej qartë mungesa e Musollit. Shkëndija e parë vjen në minutën e 9-të, por gjuajtja e Lenës u kontrollua nga Hoxha. Pas kësaj minute nis mësymja e të kuqve drejt portës kuksiane. Ekuban dhe Torasa shfaqin rrezikshmëri të vazhdueshme, por pa mundur që të mposhtin portierin Koliçi. Në minutën e 30-të Kukësi e gjen golin me Eminin, por anulohet për pozicion të parregullt të sulmuesit shqiptar nga Maqedonia. Më pas vjen sërish inkursioni i demave dhe në minutën e 32-të Ibrahimi lëshon një predhë nga distanca, por sërish Koliçi i thotë jo . Në minutat e mbetura, të dy ekipet kanë nga një rast nga
ekzekutimi i gjuajtjeve standarde, por shifrat mbeten 0-0.
Pjesa e dytë- Të dy ekipet e nisin fraksionin e dytë duke u besuar të njëjtëve lojtarë. Edhe në këtë pjesë rrezikshmëria te portat respektive vjen nga gjuajtjet nga larg dhe goditjet standarde. Në minutat e para, rastet
janë të barabarta, por mungon finalizimi, pa dyshim në këtë rast meritë kanë edhe ndërhyrjet e dy portierëve. Pas incidentit me tifozët, niveli i lojës bie ndjeshëm. Janë miqtë ata që e ulin më shumë ritmin. Ndërsa kuksianët sikur marrin më shumë zemër dhe e hedhin
vështrimin nga porta e Partizanit. Përpos tërheqjes, që erdhi edhe për shkak të lodhjes, Torasa dhe Ekuban me shpërthimet e shpejta përbënin rrezik të vazhdueshëm për mbrojtjen e Kukësit. Në minutën e 66-të, trajneri Gjoka hedh në fushë Lushtakun në
vend të Kales për t>i dhënë më shumë vrull forcës sulmuese. Në minutën e 80-të Kukësi i hedh më shumë sytë nga sulmi, duke parë edhe lodhjen e miqve. Trajneri Gjoka nxjerr nga fusha mbrojtësin Hasani dhe në lojë hyn sulmuesi Guri. Ndërsa trajneri Starova u tregua i durueshëm në zëvendësime, pasi ndërrimi i parë vjen në minutën e 84-t, ku Cetkoviç hyn në vend të Trashit. Zëvendësimet e tjera erdhën në fund, më shumë për të vonuar lojën. Takimi u mbyll në minutën e 97-të me rrjeta të paprekura.