Partizani: Tifozët u goditën nga jashtë, polici barbare
Pas reagimit të Kukësit, nuk ka vonuar edhe kundërpërgjigjja e Partizanit, që me anë të një deklarate ka dhënë versionin e tij për incidentet. Ja reagimi i të kuqve: “Klubi, nëpërmjet kësaj deklarate për shtyp, kërkon të sqarojë mbarë opinionin publik në lidhje me incidentet e ndodhura në stadiumin ‘Zeqir Ymeri’ në Kukës përgjatë ndeshjes Kukësi–Partizani. Grupi ‘Ultras Guerrils’, prej afro 600 tifozësh, të akomoduar në sektorin e caktuar nga klubi organizator, përgjatë gjithë takimit ka mbështetur në mënyrë festive dhe mjaft paqësore skuadrën. Gjithçka ka vijuar normalisht, konform rregullave normale të një përkrahjeje që publiku i bën skuadrës, kjo deri në minutën e 63-të. Për t’u theksuar, që deri në këtë moment të lojës si mbështetësit e kuq, ashtu edhe tifozeria vendase kanë qenë mjaft korrekte karshi njëra-tjetrës. Pikërisht në minutën e 63-të të takimit, në sektorin ku ishin akomoduar “Ultras Guerrils”, janë hedhur në adresë të tyre një mori sendesh të forta (ekzaktësisht gurë) nga ambientet jashtë stadiumit. Një moment që ka sjellë edhe reagimin e publikut mik, që i gjendur nën breshërinë e gurëve, të cilët filluan të vinin edhe nga tifozëria vendase nga brenda stadiumit kanë shkulur stolat për t’u vetëmbrojtur. Përpos sulmeve të publikut vendas, mbështetësit e kuq janë sulmuar barbarisht edhe nga forcat e ndërhyrjes së shpejtë, të cilët kanë ushtruar dhunë me shkopinj gome dhe gaz lotsjellës. Ndaj kësaj dhune të pakuptimtë tifozëria e kuqe është kundërpërgjigjur duke u përleshur me policinë dhe për pasojë janë plagosur 3 persona, 2 prej të cilëve (njëri minoren) kanë marrë plagë të rënda në kokë. Ata kanë marrë ndihmën e menjëhershme nga ambulanca e ndodhur në stadium dhe më pas duke parë gjendjen e tyre kritike janë transportuar në spitalin e qytetit të Kukësit. Ndërkohë, nga dhuna e ushtruar nga forcat e rendit një tjetër person u transportua drejt spitalit pa ndjenja. Klubi edhe një herë kërkon të saktësojë se një incident i tillë është provokuar nga persona të paidentifikuar dhe sigurisht nuk pajtohet me dhunën në stadiume, për më tepër kur publiku është provokuar pa asnjë shkak. Për të qenë edhe me transparent me publikun, klubi disponon edhe pamje filmike, ku shfaqen qartë sendet e forta të hedhura në adresë të mbështetësve të kuq”.