Milinkoviç e pranon: Kemi humbur shkëlqimin e dy fazave
Luftëtari/ Trajneri kërkon kthesën në sfidën e radhës ndaj Vllaznisë
Luftëtari i Mlladen Milinkoviçit, ndryshe nga sa pritej, në përballjen me Laçin nuk ia doli të hipotekonte fitoren e 8-të sezonale. Ky fakt, do të vendosë jo pak në vështirësi arritjen e objektivit të fillim të sezonit, atë të qëndrimit në Kategorinë Superiore. Dhe si për të hedhur pas krahëve barazimin e fundit, të 8-in në 23 javët e luajtura, stafi teknik i Luftëtarit nuk vonon të mbajë në tonus të tijtë, teksa dje ka vijuar përgatitjet për ndeshjen e javës së 24-t, atë me Vllazninë. Të gjithë futbollistët ishin nën urdhrat e Milinkoviçit. I vetmi që është stërvitur veçmas grupit ishte mesfushori Behar Ramadani për arsye të dëmtimit të pësuar në përballjen me Laçin.
Trajneri - Barazimi 1-1 i arritur ndaj kurbinasve për Mlladen Milinkoviç nuk erdhi rastësisht, pasi sipas tij Luftëtari e ka humbur shkëlqimin e dy fazave të para. Kështu u shpreh mes të tjerave serbi i pankinës së Luftëtarit, në konferencën për shtyp pas ndeshjes dhënë për mediat lokale. "Më duhet të pranoj e për më tepër të jem i sinqertë se para ndeshjes me Laçin u shpreha se do të mjaftonte një gol i vetëm për të arritur fitoren. Por, ata na vunë në vështirësi duke u mbrojtur mirë. Nuk e gjetëm dot 'çelësin e suksesit', kjo edhe për meritë të kundërshtarit të vendosur mirë taktikisht në fushën e lojës", tha mes të tjerash Milinkoviç. Mungesat - Vangjel Zguro do të mungojë në takimin me Vllazninë në javën e 24-t, për plotësim të numrit të tre kartonëve të verdhë. Ndërkohë që do të mungojnë gjithashtu edhe dy lojtarët anësorë të repartit të mbrojtjes. Në mesfushë do të rikthehet Albano Aleksi.
Tifozët - Edhe pse kanë duartrokitur të dyja skuadrat në barazimin mes Luftëtarit dhe Laçit, tifozët gjirokastritë shprehen të irrituar për mënyrën e sjelljes së trajnerit të kurbinasve, Bledar Sinella, në momentin e shënimit të golit të barazimit. Sipas tifozëve gjirokastritë, një trajneri profesionist nuk i ka hije të festojë golin me gjestin e tregimit të bërrylit. Përkundrazi, duhet të falënderojë vendasit për mikpritjen dhe kulturën që kanë treguar. Tomorr Shehu