Kalendar ferri, Laçi do luajë tre “finale” mbijetese

Fillimisht ndaj Partizanit në shtëpi, më pas kundër Vllaznisë në Shkodër, për të vijuar me Flamurtarin në fushën e vet, e më pas mbyll fazën e tretë me një transfertë në Durrës përballë Teutës. Laçi ka një kalendar ferri në këtë fund të fazës së tretë të kampionatit. Me pozita jo të mira në tabelën e klasifikimit, kurbinasve u nevojiten më shumë se kurrë pikët. Në fakt, skuadra e Bledar Sinellës ka bërë mirë që nga janari e në vazhdim. Pika e marrë në Gjirokastër ndaj Luftëtarit të vendit të katërt nuk ishte një rastësi. Skuadra kurbinase nuk u dorëzua pas pësimit të golit dhe arriti të barazonte, duke treguar forcë karakteri. Mirëpo, tashmë e pret një takim shumë i fortë, me një shkallë të lartë vështirësie, pasi pret në shtëpi Partizanin. Në këtë takim Laçi nuk do të ketë as mbështetjen e tifozëve, për shkak se fusha është dënuar me dy ndeshje pa spektatorë nga Komisioni i Disiplinës. Ky është sigurisht një minus i madh për bardhezinjtë, aq më tepër kur bëhet fjalë për një sfidë ndaj ekipit që pretendon titullin kampion këtë sezon. Sinella duhet t'i bëjë llogaritë në takimin me të kuqtë edhe pa mesfushorin Regi Lushkja, i cili ndaj Luftëtarit u ndëshkua me karton të kuq. Gjithsesi, atmosfera në kampin kurbinas është e mirë dhe forma që po kalon ekipi ka kënaqur Sinellën.

Rastësia me Jonuzin Fjoart Jonuzi mund të mos kishte shënuar ndaj Luftëtarit nëse nuk do të vijonte aksioni që u finalizua me goditjen e mesfushorit kuksian. Pak sekonda para se Laçi të barazonte, trajneri kishte menduar ta zëvendësonte Jonuzin, por loja nuk po ndalej dhe, për fat të lojtarit, ai u bë protagonist i shënimit të golit. Menjëherë në këtë moment Sinella ndryshoi mendim dhe zëvendësimi nuk u krye. Jonuzi qëndroi në fushë deri në fund, duke qenë ndër më të mirët për Laçin.