Sadiku, fenomenal në Lugano
Bazeli i Xhakës "vret" kampionatin. Humb Lila dhe Kaçe barazon nga stoli
Ipandalshëm. Arman do Sadiku është duke gjetur formën e tij më të mirë dhe këtë po e demonstron javë pas jave me skuadrën e Luganos, e cila tashmë nuk është aq shumë e rrezikuar për mbijetesën sa në fund të fazës së parë.
Bomberi Sadiku - Tre gola në tri ndeshjet e fundit radhazi. Çfarë mund të kërkohet më shumë nga Armando Sadiku, i cili është kthyer brenda pak javësh në liderin e Luganos dhe po gjen me rregullsi rrjetën për ta larguar sa më shpejt skuadrën e drejtuar nga Paolo Tramexani nga zona e ftohtë e klasifikimit. Nëse një javë më parë goli i tij kishte vlerën e vetëm një pike në barazimin 1-1 ndaj Vaduzit, dje Sadiku ka shënuar golin e vetëm në fitoren 1-0 ndaj St.Gallen, për të vazhduar ngjitjen në tabelën e klasifikimit të skuadrës së tij. Ishte një gol mjeshtëror nga sulmuesi, i cili u rrotullua në hyrje të zonës kundërshtare duke lëshuar një gjuajtje të pakapshme me të majtën që rezultoi vendimtare për fatin e ndeshjes.
Sulmuesi - "Dua t'i falënderoj shokët e skuadrës që luftuan të gjithë, por edhe unë vrapova për ekipin. Jam i lumtur për golin dhe për tri pikët që fituam nga kjo ndeshje. U treguam të gjithëve se jemi burra të vërtetë, ndërsa tani nuk na mbetet gjë tjetër vetëm t'i marrim ndeshjet një e nga një dhe në fund të bëjmë llogaritë ashtu siç ka thënë presidenti", tha Sadiku pas ndeshjes.
Bazeli "vrasës" - Nëse Lugano luan për mesin e tabelës, Bazeli i Taulant Xhakës nuk njeh kundërshtarë në rrugën drejt titullit. Mesfushori shqiptar luajti si zakonisht 90 minuta në suksesin 3-1 të ekipit të tij ndaj Luzernës së Hekuran Kryeziut. Ndërkaq, në Kategorinë e Dytë zvicerane, Zyrihu fitoi 4-1 ndaj Vohlen, por Kukeli nuk ishte përfshirë në 18she nga trajneri Forte.
Greqi - Ergys Kaçe nuk po arrin të fitojë minuta as te PAOK- u. Mesfushori i Kombëtares e ka ndjekur nga stoli barazimin e skuadrës së tij në transfertë ndaj Iraklisit. Në takimin tjetër të kampionatit grek, PAS Janina e Andi Lilës e ka bërë "dramë"
përballë Levadhiakos, pasi është mundur 2-1. Në fillim ka qenë Konde që ka shënuar për ekipin e mesfushorit të Kombëtares, por Vasiliou dhe Mihazes me penallti kanë përmbysur gjithçka. Në pankinë për ekipin fitues ka qenë edhe Qazim Laçi.