Milani, “all-in” për Xherard Deulofeun
Kuqezinjtë, gati të bëjnë gjithçka për ta blerë
"Me 12 milionë euro mund ta rikthejmë Deulofeun në Barcelon", ka deklaruar Robert Fernandez, përgjegjësi i merkatos blaugrana së bashku me Ariedo Braidën. Deklarata ka futur në ankth tifozët e kuqezinjve, të cilët nuk do të donin të privoheshin nga talenti 23-vjeçar. E ardhmja e sulmuesit është problemi i fundit që u shkon në mendje drejtuesve të Milanit, sepse në fillim duhet që klubi të shitet te kinezët dhe më pas të bashkëpunojnë me ta për lojtarët që do të konfirmohen apo blihen në të ardhmen. Paraqitjet shumë të mira të lojtarit kanë bërë që ai të thirret nga Kombëtarja spanjolle. Xherard Deulofeu mbërriti tek ekipi i drejtuar nga Viçenco Montela në merkaton e janarit në huazim, pa të drejtë blerjeje, pas një tratative që zgjati me javë. Galiani u mundua deri në momentin e fundit të bindte drejtuesit e Evertonit që të shtonin në kontratë të drejtën e blerjes në fund të sezonit, por akordi që kishin me klubin spanjoll nuk e lejonte këtë gjë.
"Djalli" në fund të sezonit duhet të ulet në tavolinë me Evertonin dhe Barçën për të nisur nga fillimi një tratativë për sulmuesin. Rendimenti i lojtarit nuk vihet në diskutim dhe blerja e tij duhet të vihet në plan të parë, pavarësisht se kush
do të jetë pronari i ardhshëm i klubit. Talenti, shpejtësia, teknika dhe një dëshirë e madhe për t'u ambientuar me kampionatin italian e kanë bërë Deulofeun një ndër protagonistët kryesorë të kësaj pjese të dytë të sezonit.