Debutuesi Strakosha: Ëndërr e bërë realitet
"Emocione shumë të bukura, tani kemi pak shanse për kualifikim"
Ndeshja e tij e parë si debutues, por për fat të keq me humbje. Përballë kampionëve të botës, Thomas Strakosha do të mbajë mend herën e parë që ka luajtur me fanellën e Kombëtares A, por nuk do të kërkojë asnjëherë të kujtojë rezultatin. Edhe pse nuk ishte fajtori i asaj që ndodhi, gardiani i perspektivës kuqezi ka deklaruar se tashmë ëndrra për kualifikim është venitur shumë. DEBUTIMI
Në daljen e tij për mediat pas ndeshjes, portieri i Lacios dhe Kombëtares shqiptare ka komentuar ndjesinë e tij për herën e parë që ka zbritur në fushë me skuadrën përfaqësuese. "Ishin emocione shumë të bukura, një ëndërr që u bë realitet. Por rezultati ishte zhgënjyes dhe nuk më vjen mirë. Humbëm 2-0 dhe tani kemi shumë pak shanse të kualifikohemi", është shprehur fillimisht portieri i ri i Kombëtares. Gabimet
Ndonëse vetëm 22 vjeç, Strakosha ka lexuar qartësisht gabimet që bëri ekipi ynë përfaqësues dhe bën apel për takimet e ardhshme. "Ndoshta mund të bënim më mirë, po çfarë ndodhi, ndodhi. Të shohim ndeshjen tjetër dhe të jemi më të përqendruar se janë disa gabime që nuk duhet t'i bëjmë në vijim", tha portieri debutues në "SuperSport".
GOLI I DYTË
Ai u shpreh se nuk kishte pasur probleme te goli i dytë, duke hequr dyshimet për
pozicion jashtë loje të sulmuesve kundërshtarë. "E pashë mirë topin kur u harkua dhe nuk e pashë fare Belotin. Në atë moment pashë vetëm Çiron që kërceu dhe nuk e arrija dot topin", ka vijuar portieri.
DERBI TE LACIO
Në skuadrën kryeqytetase në Serinë A, ai është shok skuadre me një nga sulmuesit "axurrë". "Biseda me Imobilen te Lacio? Unë u munda dhe ai është fitues, ndaj do të jetë pak i rëndë me mua në stërvitje", tha ai.