Shpresat sfidojnë Moldavinë në Elbasan
Trajneri Alban Bushi është optimist: Ndeshje që do të na vlejnë, dua t'i fitojmë të dyja
Kombëtarja Shpresa do të luajë sot, në orën 15:00 miqësoren e parë kundër Moldavisë në stadiumin "Elbasan Arena". Me këtë kundërshtar skuadra e Alban Bushit do të përballet edhe dy ditë më pas, pikërisht në orën 15:00, por në stadiumin "Selman Stërmasi". Dje kuqezinjtë e rinj u stërvitën në Elbasan, për t'u dhënë dorën e fundit përgatitjeve. Trajneri Bushi është i kënaqur me atë që lojtarët kanë treguar në stërvitje gjatë kësaj jave. Dy miqësoret me Moldavinë do të shërbejnë për konsolidimin e grupit, në mënyrë që Bushi të ketë një ide të qartë për ndeshjet eliminatore, që nisin në muajin qershor. "Mendoj se është një test shumë i rëndësishëm për ne. Për këto dy miqësore shumicën e lojtarëve i kemi grumbulluar për herë të parë dhe kemi nevojë të konsolidojmë grupin. Objektivi dhe dëshira ime mbetet t'i fitoj të dyja miqësoret. Gjithsesi, rëndësi ka që do të na vlejnë edhe në evidentimin e lojës së gjithsecilit", ka thënë fillimisht Bushi në një bisedë për "Panorama Sport". I pyetur nga gazeta se cilët prej lojtarëve aktualë janë gati për të bërë hapin e madh, duke qenë nën urdhrat e Xhani De Biazit, ish-menaxheri i Kombëtares deklaroi: "Nuk dua të citoj shumë emra, por gjithsesi elementë si Emanuele Ndoj, Endri Çekiçi dhe Keidi Bare mendoj se janë në rrugë të mbarë. Në Kombëtare sot ka edhe 21-vjeçarë që akoma mund të ishin me Shpresën. Pra, dua të them se detyra jonë primare mbetet të çojmë sa më shumë futbollistë në ekipin A. Ne kemi shumë futbollistë të ditëlindjes 1998, që mund të japin kontribut edhe pas dy vitesh me U-21". Kujtojmë që Shqipëria U-21 është në grupin 2 eliminator, ku bëjnë pjesë Spanja, Sllovakia, Irlanda e Veriut, Islanda dhe Estonia. Ndërkohë, një nga risitë e këtij grumbullimi është edhe talenti shqiptar nga Maqedonia, i cili është pjesë e klubit zviceran, Jang Bojs. Edhe pse ka luajtur me përfaqësueset e moshave të Maqedonisë, Seferi iu përgjigj pozitivisht ftesës së Shqipërisë.