Milinkoviç kërkon regjim të fortë sportiv nga lojtarët
Luftëtari po e shfrytëzon më së miri periudhën e ndërprerjes së kampionatit, kështu që skuadra ka vijuar edhe dje përgatitjet me dy seanca. Shpresohet që stafi teknik ta ketë sa më në formë ekipin për ndeshjen mbyllëse të fazës së tretë, atë me Kukësin. Stafi teknik i Luftëtarit, me në krye trajnerin Mlladen Milinkoviç, mbetet i prirur për të ruajtur përqendrimin para transfertës së Kukësit. Një javë para mbylljes së fazës së tretë, Luftëtari i ka mbyllur llogaritë me vendin e katërt, por për hierarkinë e gjirokastritëve është koha për të mos humbur asnjë minutë. Parë në këtë prizëm, trajneri Milinkoviç, edhe pse ka kohën e mjaftueshme për të përgatitur strategjinë anti-Kukës, nuk resht së testuari të tijtë sa i takon vendosjes taktike në fushë. Në seancën stërvitore të pasdites së djeshme, të zhvilluar në stadiumin "Gjirokastra", trajneri serb dhe stafi i tij hodhi në fushë katër mini-skuadra, të ndara me nga pesë futbollistë. Pjesë e grupit të lojtarëve që u përgatitën dje me ekipin ishin edhe disa futbollistë të rinj, të cilët në njëfarë mënyre kompensojnë mungesat e lojtarëve të padisponueshëm. Disa herë trajneri Milinkoviç ka insistuar gjatë seancës së pasdites së djeshme për përqendrim dhe zbatimi me fanatizëm i detyrave taktike. Momentalisht, nuk mund të thuhet se Milinkoviç ka ideuar ndonjë formacion për transfertën e Kukësit, pasi, nga sa mësohet, gjithçka do të vendoset javën e ardhshme. Milinkoviç, nisur nga afati i gjatë kohor për përgatitjen e ndeshjes me Kukësin, u ka kërkuar të tijve regjim të fortë sportiv, qëndrim në grup dhe jo dalje individuale. Edhe në ditët në vazhdim Luftëtari do të vijojë përgatitjet me dy seanca stërvitore në ditë. "Fusha e Vjetër" do të jetë terreni stërvitor i paradites, ku futbollistët do të fokusohen kryesisht te përgatitja atletike, ndërkohë që pasdite do të punohet me topin dhe me skema taktike. Luftëtari pas javës së 26-të renditet në vendin e katërt, ndërkohë që Kukësi mban "flamurin" e kryesuesit me 52 pikë, duke mos njohur asnjë humbje. Tomor Shehu