Llogaritë e Eminit: Kemi edhe 10 finale, s'na falen gabimet
Kukësi do të udhëtojë drejt Kosovës mëngjesin e sotëm për miqësoren e programuar me Lirinë e Prizrenit. Vëllazërorja do t'i shërbejë stafit teknik për të mbushur boshllëkun e pauzës, por edhe për të parë gjendjen e lojtarëve. Izair Emini e vlerëson si të rëndësishme këtë ndeshje, edhe pse është vetëm një test. Sulmuesi, në një deklaratë të dhënë për "Panorama Sport", thotë se skuadra nuk do të falë në këtë 90-minutësh. Madje, tetovari kujton se në Prizren ka një numër të madh përkrahësish të ekipit të Kukësit, ndaj parashikon një atmosferë elektrizuese në stadium. "Këto miqësore kanë shumë vlerë, pasi i shërbejnë ekipit për të mbajtur formën. Pastaj, do të kemi edhe luksin që të njihemi nga afër edhe me ekipin e Prizrenit dhe fansat e tyre, pasi kam dëgjuar shpesh për ta. Duke qenë se Kukësi me Prizrenin janë afër gjeografikisht, dimë që kemi shumë përkrahës nga ky qytet. Sa për ndeshjen do të futemi për ta fituar. Tashmë ky mentalitet na është injektuar, ndaj çfarëdolloj sfide që të luajmë, e marrim më shumë se seriozisht", u shpreh autori i 8 golave. Luftëtari - Barazimi i marrë në Korçë ka shtuar ndjeshëm dozat e entuziazmit në ekip. Mbeten në krye dhe këtë sezon titulli duket shumë herë më pranë. Megjith-
atë, Emini kërkon kujdes në 10 javët e mbetura, duke filluar nga Luftëtari. Ai e cilëson kundërshtar të rrezikshëm dhe thekson se ka dëshmuar se mund t'u marrë pikë edhe të mëdhave. "Mendoj që, pas ndeshjes në Korçë, gjendja në ekip është shumë e mirë dhe atmosfera gjithashtu. Por ai barazim duhet
arkivuar tashmë, pasi vjen radha e Luftëtarit. Gjirokastritët kanë dëshmuar se kanë një ekip shumë cilësor dhe meriton respekt. Mirëpo, ne kemi objektivat tona dhe kemi filluar të përgatitemi për ta kaluar me sukses edhe këtë duel. Nuk mund të flasim me askënd, ndaj duhet kjo fitore", theksoi
tetovari.
Gara - Sulmuesi 31-vjeçar është i bindur se, në këtë moment, që të gjitha ndeshjet janë finale dhe përcaktuese. Edhe kundërshtarët, ashtu si Kukësi, duan të shpallen kampionë në finish. "Për ne tani e në vazhdim të gjitha ndeshjet janë përcaktuese. Nëse duam titullin, nuk na lejohen hapat falsë. Këtë e kemi të gjithë të qartë. Rivalet dihet që kanë objektiva ashtu si dhe ne, por në fund vetëm një e merr. Ai që do gabojë më pak, ose aspak. Gjithsesi, ne shohim vetëm veten dhe ecurinë tonë. Nëse vijojmë me të njëjtin ritëm, vendi i parë do të mbetet yni", përfundoi Emini. Skerdilaid Sulozeqi