Smajlaj bëhet milioner, nderohen kampionët e së kaluarës
Përmes një ceremonie të zhvilluar dje në kryeqytet, Federata Shqiptare e Atletikës ka vlerësuar dy atletët e saj më të mirë të vitit. Izmir Smajlajt dhe Luiza Gegës iu dorëzuan pllakatet e "Atletit më të mirë të vitit 2016" për sukseset e tyre të mëdha sportive. Ndërsa një vit më parë Gega do të kurorëzohej në Amsterdam nënkampione e Europës në 3000 metra me pengesa, Smajlaj u shpall kampion i Europës në sallat e mbyllura pak kohë më parë në kërcimin së gjati në Beograd. Përballë tyre ishin ulur në sallë edhe disa prej figurave të "Mbretëreshës së Sporteve", të cilët janë nderuar me titullin "Nderi i Atletikës Shqiptare" për kontributin e çmuar të dhënë ndër vite dhe rritjen e cilësisë sportive. Në fjalën e tij përshëndetëse, presidenti i Federatës Shqiptare të Atletikës, Gjergj Ruli, ka shprehur mirënjohjen për rezultatin e arritur nga Smajlaj dhe Gega, njëherazi edhe për dy trajnerët Vildan Tufi dhe Taulant Stërmasi. "Jemi krenarë për sportistët në vite, të cilët kanë vënë gurë në kolonat e kësaj federate, gjithashtu edhe për dy kampionët tanë të rinj që plotësuan këtë ansambël. Sot, Federata Shqiptare e Atletikës ka luksin e madh që të ketë në krahë dy kampionë të mëdhenj si 'Mbretëreshën' Luiza Gega, e cila për herë të parë solli medalje për atletikën shqiptare dhe Izmir Smajlajn, i cili plotësoi këtë kurorë me diamante duke sjellë medaljen e artë qoftë nga Ballkaniada dhe nga kampionati europian", u shpreh presidenti Ruli. Një përshëndetje të rastit ka bërë edhe presidenti i Komitetit Olimpik Kombëtar Shqiptar, Viron Bezhani, i cili mori angazhimin që do të jetë pranë këtyre dy yjeve të atletikës shqiptare, por edhe atletëve të perspektivës. Gjithashtu një përshëndetje rezervoi edhe sekretari i përgjithshëm i federatës, Nikolin Dionis. Më pas, ceremonia vijoi me dorëzimin e pllakateve "Nderi i Atletikës Shqiptare" për Sugar Ahmetin (pas vdekjes), Elisabeta Morinën, Dashamir Sherjan, Franc Curanin, Mustafa Tukseferin dhe Zhuje Bajko Breçani. Ndërkohë, atleti shkodran Smajlaj mori edhe çekun prej 4 milionë lekësh të rinj si premio nga vendimi i Këshillit të Ministrave për medaljen e artë të marrë në Beograd. Olgert Serani