Tension në Pukë, Besa akuza politikës
Përplasje tifozësh në Cërrik, Dinamo reziston kundër Sopotit
Akuza, protesta, bojkot dhe shumë tension. Sfida e djeshme në Pukë mes Tërbunit dhe Besës ka prodhuar akuza të shumta nga miqtë nga Kavaja. Një gol shumë i kontestuar nga kavajasit ka vendosur sfidën që u ka dhënë 3-pikëshin...
Akuza, protesta, bojkot dhe shumë tension. Sfida e djeshme në Pukë mes Tërbunit dhe Besës ka prodhuar akuza të shumta nga miqtë nga Kavaja. Një gol shumë i kontestuar nga kavajasit ka vendosur sfidën që u ka dhënë 3-pikëshin pukjanëve. Pas fitores së djeshme, Tërbuni ka lënë vendin e fundit, duke shpresuar më shumë te mbijetesa. Ndërsa administratori i Besës, Ilirjan Berati, ka kërkuar që politika të mos ndërhyjë në futboll, si dhe ka sqaruar bojkotin që donin t'i bënin ndeshjes kavajasit. Si asnjëherë këtë vit, në tribunë ishin kryebashkiaku i Pukës, Gjon Gjonaj, së bashku me deputetin e zonës, Pjerin Ndreu. Ky i fundit ka premtuar mbështetje maksimale për ekipin, duke garantuar se Tërbuni do të arrijë të mbijetojë.
TAKIMI
Loja nis menjëherë me gol. Një aksion i vendësve me topin që përfundon te Saliaj, që godet dhe kalon të tijtë në avantazh. Miqtë protestojnë fort, duke pretenduar se topi nuk e kishte kaluar vijën fatale. Kavajasit tërhiqen për disa minuta, duke mos pranuar të vazhdojnë. Megjithatë, me ndërhyrjen e zyrtarëve të takimit, rinis loja. Në pjesën e dytë bëhet një luftë e fortë sportive me miqtë që kanë disa raste për të barazuar, por pa rezultat. Nga ana tjetër, vendësit e ruajnë avantazhin deri në fund, duke siguruar një 3-pikësh të rëndësishëm. AKUZAT
Pas përfundimit të sfidës së djeshme, administratori i Besës, Ilirjan Berati, u shpreh: "Si asnjëherë më parë, në tribunë ishin shumë politikanë, kryebashkiakë dhe deputetë. Që në fillim kishte presion verbal dhe dukej se Tërbuni duhej të fitonte medoemos në këtë sfidë. Dhe pukjanët fituan me një gol krejtësisht të parregullt. Ju garantoj se topi jo vetëm që nuk e kaloi vijën fatale, por ishte më shumë se 1 metër jashtë. Është e papranueshme që të luhet futboll në të tilla kushte. Ne dëshironim ta bojkotonim sfidën, pas atij goli, por pas diskutimeve që bëmë me drejtues të FSHF-së, vendosëm të luanim sërish. Na thanë se
do të dënoheshim nëse nuk vazhdonim lojën. Në këtë mënyrë ishim të detyruar të luanim. Kam një thirrje për politikanët që të mbajnë duart larg nga futbolli. Është vetëm një lojë dhe nuk mund të vendosin njerëz nga tribuna se cila skuadër do të fitojë. T'ia lënë fushës rezultatin e të mos ketë ndikime nga jashtë. Ne do të dërgojmë relacion në FSHF në lidhje me këtë padrejtësi që na është bërë. Ishte një gol skandaloz që na ndëshkoi", përfundoi reagimin e tij për gazetën "Panorama Sport", administratori Berati.