Shkëlqimi i Latifit, Skënderbeu varet nga këmbët e mesfushorit
19 pikë të kampionëve, me shenjën e yllit nga Prishtina
Liridon Latifi është lojtari i momentit në kampionatin shqiptar. Mesfushori 23-vjeçar i Skënderbeut po bën sezonin e tij më të mirë, që kur iu bashkua korçarëve në janar të vitit 2014. Ka realizuar deri më tani 10 gola në kampionat dhe 1 në Kupën e Shqipërisë. Sa herë ai gjen rrugën e rrjetës, Skënderbeu rrallë mund të stonojë sa u përket rezultateve. Statistikat janë kokëforta, pasi nga 9 ndeshje ku kosovari ka shënuar këtë kampionat, korçarët kanë fituar 7 prej tyre, barazuar 1 dhe humbur po kaq. Tri javët e fundit kanë qenë plotësisht në diktatin e tij. Gol me vlerën e tri pikëve në transfertën e Vlorës, më pas vulosi kualifikimin e Skënderbeut në finale, duke shënuar në ndeshjen e kthimit ndaj Teutës në Durrës. Së fundmi, tronditi Laçin me një tripletë, në një fushë ku të zotët e shtëpisë duhet të kthehen dekada pas për të parë se kur kanë pësuar për herë të fundit 5 gola. Javë pas jave kosovari po konfirmon se sa i rëndësishëm është për kampionët në fuqi. Në ndeshjen e fundit në Laç, përveçse hapi siparin e golave me një goditje spektakolare, "detyroi" edhe Hamdi Salihi të bënte rolin e fantazistit. Sulmuesi shkodran i dha asistin e golit të tretë personal Latifit, ndërsa vetë vulos triumfin e thellë. Bomberi shkodran numëron 12 gola, dy më shumë se mesfushori. Në vetëm dy ndeshje kanë arritur që të shënojnë të dy, pikërisht në fitoren 2- 0 ndaj Tiranës në javën e 16-të dhe triumfin e fundit 1-5 në Laç. Efikasiteti
Asnjë gol nga pika e bardhë e penalltisë. Në krahasim
me bomberët e tjerë të kampionatit shqiptar, Latifi ka lënë shenjën e tij vetëm në gola me aksione të rrjedhshme, të finalizuara me goditje nga brenda dhe jashtë zone. Gola me të dyja këmbët dhe për më tepër shumë efikas për skuadrën. Ka meritën e padiskutueshme në 19 pikë të grumbulluara, ku në 5 ndeshje ka marrë për dore skuadrën, duke vendosur ai gjithçka. Nga goli që riktheu besimin te titulli kampion në Vlorë, tek ai që kualifikoi ekipin në finalen e Kupës.
Tashmë te Skënderbeu duhet të luten që Latifi të mbajë të njëjtin ritëm në gjashtë javët e mbetura. Kjo pjesë e dytë e kampionatit po tregon se sa i rëndësishëm është 23-vjeçari për skuadrën e Ilir Dajës. Nga skuadrat e kreut kështu mund të flitet vetëm për Pero Pejiçin dhe Kaleb Ekubanin, me këtë të fundit që ashtu si Latifi, nuk ka shënuar asnjë gol nga penalltia. Ndërsa kryegolashënuesi i Superiores, Pejiç (20 gola deri më tani), ka kthyer në gol 8 penallti nga 9 të goditura.