Vrenozi fiton duelin me ishkampionin e botës

Boksieri fierak Xhulio Vrenozi ka kohë që po stërvitet në boksin profesionist në Piacenca të Italisë me ekipin Salus. Ditën e diel, në kuadrin e përgatitjeve për titullin WBO internacional ka zhvilluar një tjetër duel miqësor. Kësaj here fieraku 24-vjeçar ka pasur përballë boksierin e njohur 31vjeçar nga Nikaragua, Eusebio Oseio, ish-kampion bote me 52 ndeshje në karrierë. Vrenozi pas një dyluftimi të fortë prej 6 raundesh dhe i mbështetur nga afro 700 tifozë të tij ka arritur ta mposhtë kundërshtarin me pikë. Boksieri fierak, i cili po përgatitet për majat më të larta të boksit profesionist do të shprehej nëpërmjet linjës telefonike për "Panorama Sport" i gëzuar për suksesin e radhës. "Jam në vazhdim të përgatitjeve përpara se të garoj për titullin e lartë WBO internacional. Ndihem në një formë të mirë sportive dhe këtë e tregova dhe në këtë ndeshje miqësore ndaj një boksieri me emër dhe me përvojë. Zhvillova një ndeshje relativisht të mirë duke treguar rritje si në aspektin fizik, ashtu edhe atë teknikotaktik dhe jam shumë i lumtur që arrita të fitoj. Do të qëndroj me këmbë në tokë larg vetëkënaqësisë dhe do të vijoj të stërvitem me përkushtim maksimal, pasi synimi im më i afërt është fitimi i titullit në WBO internacional që do t'i paraprijë garës për titullin botëror", ka përfunduar boksieri Vrenozi. Mikel Mbriçaj