"Jam përgjegjës për golin, duhet të kisha bërë faull"

Në aksionin e fundit të ndeshjes, Barcelona arriti të shënoi një gol që u dha mundësinë të shpresojnë më shumë se kurrë te titulli kampion. Në fakt, ajo që ra në sy ishte dyluftimi i Marselos me Serxhi Roberton në mesin e fushës, ku braziliani nuk u tregua mjaftueshëm agresiv dhe lejoi që kundërshtari të vraponte më tepër se 40 metra i pashqetësuar. Pikërisht në momentin që iu desh të ndërhynte, Marselo ngriti duart, duke treguar se nuk kishte si synim të shkaktonte faull. Por, pas ndeshjes mbrojtësi i Realit ka marrë të gjithë përgjegjësinë, duke pranuar se duhet ta kishte ndaluar edhe në mënyrë të parregullt, pasi ajo do kishte mjaftuar që të përfundonte edhe koha shtesë që ishte programuar. "Në fillim dua të them se ne barazuam në një moment që askush nuk e besonte se mund t'ia dilnim mbanë. Ishim me një lojtar më pak, por merituam të merrnim patjetër pikë kundër Barcelonës. Në aksionin e fundit, ndihem përgjegjës për golin e pësuar. Duhet të kisha ndërhyrë edhe në mënyrë të gabuar kundër Serxhi Robertos, por në ato momente nuk e mendova se do kishte qenë aksion aq i rrezikshëm. Nuk lexohet dot e ardhmja. Gjithsesi, për situatën dhe sekondat e mbetura, nuk duhet ta kisha lejuar në asnjë mënyrë që ai të më kalonte", u shpreh braziliani. Nga pamjet filmike u pa edhe që Kristiano Ronaldo i bërtiti në ato momente: "Shkakto faull", por që krahu i majtë i mbrojtjes nuk e zbatoi. Më pas, portugezi nuk i mbajti dot nervat, duke shpërthyer në fushë nga mërzia. Pas golit që realizoi Lionel Mesi në minutën e 92-të, Barça arriti të barazojë me pikë rivalët historikë të Realit, ndonëse këta të fundit kanë edhe një ndeshje më tepër të zhvilluar.