A ia del Ulraish kundër Dortmundit?!

Ditën e mërkurë, skuadra e Bajernit do të luajë ndaj Dortmundit për gjysmëfinalen e Kupës së Gjermanisë. Portieri i dytë i bavarezëve, Sven Ulraish, do të jetë në krye të një prej detyrave më të vështira që prej momentit që mbërriti në Mynih. Pas dy vitesh te skuadra e Bajernit, 28vjeçari do të luajë ndeshjen e tij më të rëndësishme me fanellën bavareze, si pasojë e dëmtimit të Nojerit ( do të mungojë deri në fund të sezonit për shkak dëmtimi). "Më pëlqen të luaj ndeshje si kjo çdo ditë", ka thënë Ulraish për ndeshjen e së mërkurës. Pas një performance të mirë në takimin ndaj Maincit, ku portieri arriti ta shpëtonte portën bavareze nga një goditje e rrezikshme e Levin Ocunali, ai do të jetë në një ndeshje të një rëndësie të madhe. Në një të tillë, Ulraish ka mundur të luajë vetëm një herë në sezonin 2015-' 16 ndaj Fishligist Notingen. Në total, portieri 28-vjeçar ka luajtur në 34 sfida për kupë (18 në Kupën e Gjermanisë dhe 16 në Europa Ligë). Nga ana tjetër, i padiskutueshmi Nojer koleksionon plot 105 sfida të luajtura për kupë ( 53 në Kupën e Gjermanisë dhe 52 në kompeticionet europiane). Por, 28-vjeçari Ulraish nuk do të krahasohet me Nojerin. "Unë jam numri 2, për këtë përfaqësoj Nojer në skuadër. Nuk dua të quhem zëvendësues. Nojerin nuk mund ta zëvendësosh, pasi ai është portieri më i mirë në botë", ka thënë portieri i dytë bavarez. Nga ana tjetër, shokët e skuadrës shprehin mjaft besim për Ulraish. "Sven është një portier mjaft i mirë", ka thënë Rafinja. Ne kemi mjaft besim tek Ulraish, pasi e shohim çdo ditë në stërvitje cilësinë e tij. Ai fiton sa më shumë siguri, në çdo ndeshje që luan me ne", ka thënë Humels. Pjesa e mbetur e këtij sezoni mund të jetë edhe e fundit e Ulraishit me fanellën bavareze, ndaj për këtë portieri ka deklaruar se: "Kjo pjesë nuk është shumë e rëndësishme në këto momente. Kemi disa ndeshje vendimtare përpara, të cilat duhen mbyllur me sukses. Ndaj le të fokusohemi se si do ta finalizojmë në mënyrën më të mirë këtë sezon".