Rikonfirmohet Pioli, Interi “burgos” lojtarët

kipi do të jetë në grumbullim deri në ndeshjen me Napolin

Ditën e djeshme, In teri ka lëshuar një komunikatë zyrtare nga faqja zyrtare e klubit, ku ka folur me tone shumë të ashpra ndaj lojtarëve dhe ka konfirmuar për të disatën herë trajnerin aktual, Stefano Pioli. Shoqëria nuk ka ndër mend të privohet nga shërbimet e trajnerit italian (puna e tij konsiderohet e jashtëzakonshme) dhe nga shërbimet e stafit. Drejtuesit, gjithashtu, kanë zyrtarizuar se nga sot dhe deri më datë 30 prill, kur do të luhet ndeshja kundër Napolit, skuadra do të jetë në grumbullim në "Appiano Gentile".

KOMUNIKATA - Kjo është përmbajtja e plotë e komunikatës: "Duke parë paraqitjen e skuadrës të shtunën në fushën e Fiorentinës, klubi ka vendosur që ekipi të jetë në grumbullim duke filluar nga data 25 prill deri në sfidën që do të zhvillohet në ' San Siro' të dielën kundër Napolit. Mënyra se si klubi ka humbur me Fiorentinën është e papranueshme për tifozët tanë, si në Itali, ashtu dhe jashtë vendit, ndaj jemi të detyruar të marrim këtë vendim që këto situata të mos përsëriten më. Të gjithë duke filluar nga stafi e deri te lojtarët janë të vendosur që të punojnë sa më shumë të jetë e mundur për të arritur rezultate më të mira dhe ta mbyllin këtë sezon në rritje. Si rrjedhojë, klubi dhe pronarët e klubit konfirmojnë besimin e madh që kanë për Stefano Piolin dhe gjithë stafin e tij. Pioli është bashkuar me ekipin në një moment shumë të vështirë dhe puna e marrë përsipër nga ai në gjashtë muajt e fundit ka qenë e jashtëzakonshme dhe meriton respektin tonë maksimal. Klubi nuk do të shpërqendrohet nga zërat që qarkullojnë rreth klubit, objektivi ynë mbetet ai i përfundimit të kampionatit të Serisë A në mënyrën më të mirë dhe kualifikimi në një kompeticion europian, duke dhënë maksimumin në çdo ndeshje. Lojtarët, veç të tjerash, janë të detyruar të nderojnë ngjyrat zikaltër me nder, siç edhe thuhet në historinë dhe traditën e këtij klubi të madh".